El Real Oviedo estrénase en Primera con derrota

Nueva temporada en marcha. El Real Oviedo visitó esti vienres l’Estadiu de La Cerámica pa entamar la so andadura na máxima categoría del fútbol español. Los de Marcelino, con dos goles na primer parte, llevaron el duelu nun choque nel que’l cuadru carbayón falló un penalti y xugó con un xugador menos dende’l minutu 27.

 

Aarón Escandell, Nacho Vidal, Dani Calvo, Oier, Rahim, Sibo, Reina, Chaira, Hassan, Ilic y Rondón. Esti foi’l once escoyíu por Veljko Paunovic pal estrenu en Primera. El partíu nun se podía poner meyor pa los ovetenses, yá que nel minutu 14 Chaira foi derribáu pol meta local y l’árbitru nun dubió en señalar penalti. Rondón asumió la responsabilidá pero’l so disparu foi adivináu por Junior Reís. El Villarreal medró a partir d’esa acción y fízose dueñu y señor del partíu cuando Alberto Reina vio dos tarxetes amarilles en namás diez minutos. L’Oviedo quedábase con diez y a partir d’ehí tocaba remar. Etta Eyong y Gueye marcaron pal submarín mariellu na primer metá y el partíu marchaba 2-0 al descansu.

 

Tres el descansu, Marco Esteban entró por Hassan y d’esta miente el canteranu debutaba en Primera. Na segunda metá’l ritmu baxó y l’Oviedo supo aguantar los ataques locales. Viñas, Borja Sánchez y Omar Falah tamién tuvieron minutos nun partíu marcáu por esa tempranera espulsión de Reina. A pesar del mal sabor de la derrota, hai que destacar l’homenaxe del entamu y la ovación al salir al campu de La Cerámica a Santi Cazorla. Recibimientu de lleenda, como lo que ye, pa zarrar un partíu que tuvo de too. Agora, turnu pa pensar nel Real Madrid que visitará’l Tartiere’l domingu de la próxima selmana.