Tal día como güei, un 10 de febreru, nel añu 1935, Isidro Lángara establecía la marca de diez goles en tres partíos consecutivos de Primera División, lo que consiguió en encuentros nos que'l Real Oviedo s'enfrentó al Atlético de Madrid, Valencia y Espanyol de Barcelona.
Naide enantes había consiguir tal fazaña na máxima categoría del fútbol español y naide consiguió dende entós superalo nin siquier igualalo. El delanteru del Real Oviedo ye l'únicu futbolista que lo llogró nes 95 ediciones del Campeonatu Nacional de Lliga disputaes hasta güei.
El 27 de xineru de 1935, na novena xornada de Lliga de la temporada 1934-35, na que'l Real Oviedo s'enfrentaba al Atlético de Madrid nel estadiu Metropolitanu, Lángara marcó tres goles. El partíu finó col resultáu de 3-3.
Una selmana dempués, na xornada décima, disputada'l 3 de febreru de 1935, el Real Oviedo ganó por 0-4 al Valencia en Mestalla y tres de los goles fueron obra de Lángara.
Tres dos partíos afrontaos fuera de casa, na undécima xornada, disputada'l 10 de febreru de 1935, al Real Oviedo tocábalu xugar nel so feudu, el Stadium de Buenavista, énte l'Espanyol de Barcelona. El conxuntu asturianu impúsose col resultáu de 8-3 y la metá de los goles del equipu local fueron marcaos pol so delanteru centru, Lángara.
Isidro Lángara proclamóse máximu goleador de la Primera División esa temporada, igual que yera fecho la anterior y como haría de nuevu la siguiente campaña.
Entre les varies marques establecíes pol gran delanteru del Real Oviedo y que entá naide superó nin igualó, destaca la del meyor promediu goleador de la Primera División; 1,17 tantos por partíu.
Lángara ta consideráu pola Federación Internacional d'Hestoria y Estadística de Fútbol (IFFHS, poles sos sigles n'inglés) el meyor goleador español de la hestoria.