El Real Oviedo firmó una contundente victoria en Balaídos tres imponese por 0-3 al Celta de Vigo, nun alcuentru que dexó bien satisfechu al so técnicu, Guillermo Almada, quien destacó especialmente'l trabayu colectivu del so equipu na rueda de prensa posterior al partíu.

El míster oviedista punxo en valor la solidez amosada tanto n'ataque como en defensa: “Quedo coles solides como equipu enriba y embaxo. Presionamos bien enriba, n'otros momentos arropámonos meyor. Ganar al Celta dignifica'l trunfu; lo que más me prestó foi la parte colectiva. Resaltaron les individuales gracies a esi trabayu. Hai que siguir na mesma llinia”.

Almada tamién esplicó los axustes realizaos tres el descansu, claves pa sentenciar l'alcuentru: “Intentamos correxir dalguna cosa que nos tenía inquietos. La meyor manera de defender ye siguir buscando y dir p'alantre. Fíximoslo al entamu de la segunda parte, con personalidá, y atopámonos col tercer gol que mos dio tranquilidá. El resultáu ayudónos”.

Por último, el técnicu quixo destacar el papel fundamental de la afición azul, que volvió acompañar al equipu llueñe del Carlos Tartiere. “Yá lo dixi, el sofitu de la xente na casa y fuera ye incondicional y sentímosnos arropaos. Los xugadores tán tresmitiendo coses, pero la entrega ye mil por mil permanentemente. Damos pasos p'alantre, medrando como equipu”, destacó.

Cola vista yá puesta nel próximu compromisu frente al Villarreal CF, Almada insistió na importancia de caltener esti nivel colectivu y detalló que "hai que siguir, pensar yá en lo que vien. Si tenemos actuaciones colectives como güei, abriránse más posibilidaes”.