El Real Oviedo viaxaba a Andorra ensin apenes descansu tres el partíu
coperu p´apostar el so primer alcuentru de LaLiga SmartBank d'esti 2023.
Nel Estadi Nacional los azules formaben d'entamu con: Braat, Costas, Dani
Calvo, Lucas, Abel Bretones, Jimmy, Luismi, Viti, Hugo Rama, Sergi Enrich y
Borja Bastón.
Mala primer metá del conxuntu d'Álvaro Cervera que se vió superáu pol
cuadru local. Primeros 10 minutos de xuegu y primer sustu pa los
carbayones, el VAR correxía al colexáu n'una falta de Costas que l'árbitru
vía dientro de la área y que finalmente se señaló en cantu de la mesma. Nun
sirvió como revulsivo al Real Ovieco´l respigu, que nel 18' yá diba embaxo
nel marcador tres gol de Almpanis nuna bona xugada del atacante griegu.
Nun esmolíen los azules la meta defendida por Lizoain, salvu nun disparu
alloñáu de Bretones y una falta botada por Hugo Rama que xeneraba
incertidume na área pequena. Y un minutu primero que Moreno Aragón
decretara'l descansu vería l'equipu carbayón como de nuevu Almpanis
marcaba'l segundu pa los locales.
La segunda parte arrincaba con otros aires pal Real Oviedo, presión alta y
primer ocasión clara nel 53'. Jimmy combinaba con Rama que peneraba pa
Bastón, nel mano a mano salió vencedor la meta del Andorra qu'estenaba a
córner. Los cambeos resultaron ser efectivos y nel 74' un balón paráu cutíu
por Koba Leïn yera cabeciáu por Dani Calvo pa retayar distancies.
Tuvo l'empate'l conxuntu azul, güei cola so segunda equipación. To mio nel
77' de Koba y Abel Bretones, centru del asturianu que tres estene de
Lizoain yera cruciáu por demás por Viti. Tamién la tuvo Obeng nun remate
con la testa que s´estenó a saque d'esquina, pero cuando paecía que podía
llegar la igualada, un remate maxistral de Bakis asitiaba'l definitivu 3-1
pa los de Sarabia que merecieron ganar.
Mañana'l Real Oviedo vuelve a casa y el llunes va empezar a preparar el so
choque del vienres énte'l Deportivu Alavés nel Carlos Tartiere.