El Real Oviedo afrontaba una auténtica final nel Ciutat de València ante'l Levante UD, un duel marcáu en coloráu na llucha pola permanencia. Sicasí, el resultáu final (4-2) dexa a los de Guillermo Almada nuna situación bien comprometida y con un panorama cada vez más complicáu.
L'alcuentru entamó de la peor manera posible pa los intereses azules. El Levante salió decidíu a imponer el so ritmu dende'l primer minutu, dominando'l xuegu y xenerando constantes llegaes de peligru, especialmente al traviés de Carlos Espí. El delantera granota foi'l gran protagonista del entamu, firmando los dos primeros goles del partíu en apenas unos minutos y colocando un 2-0 que reflexaba lo que se taba viendo sobre'l céspede.
L'Oviedo, superáu, nun atopaba la forma d'asentase nel campu nin d'averase con claridá a la portería defendida por Ryan. De fechu, el mesmu Carlos Espí tuvo cerca de firmar el terceru nuna ocasión clarísima, anque'l so remate nun atopó portería, dando un respiru a los carbayones.
Cuando peor pintaben les coses, el conxuntu oviedista tiró d'orgullu enantes del descansu. Primero foi Ilyas Chaira quien recortó distancies con un certeru cabezazu, y yá nel tiempu amestáu apaeció Fede Viñas. El delantera provocó un penalti y tresformólu él mesmu pa poner el 2-2 y devolver l'esperanza a los sos.
Tres el pasu por vestiarios, el partíu volvía entamar, pero'l golpiu volvió ser pa l'Oviedo. Un disparu llonxanu d'Iker Losada, que tocó en Sibo, desvió la trayeutoria del balón y fixo imposible la intervención d'Aarón Escandell, significando'l 3-2.
De nuevu tocaba remar a contracorriente. Almada movió'l banquillu en busca de soluciones, pero nesta ocasión el Levante supo xestionar la so ventaxa con intelixencia. El ritmu del alcuentru decayó y les ocasiones escasearon, con dambos equipos incapaces de xenerar peligru real nel tramu final.
Yá nel descuentu, el conxuntu local sentenció'l choque col cuartu gol, zarrando definitivamente'l partíu y llevándose tres puntos vitales na so llucha pola salvación mientres que'l Real Oviedo queda nuna situación bien complicada.
