La xornada 26 en LaLiga Smartbank llevó al Real Oviedo a tierres madrilanes, para vese les cares nel Fernando Torres col Fuenlabrada. El choque acabó con tables nel marcador, y repartida de puntos para dambos equipos.
Volvía'l Cuco Ziganda a repitir l'once de la última xornada énte'l Lugo, para encarar un partíu nel que los azules saltaron al terrén más enchufados qu'el so rival, llevando'l pesu del partíu, nuna primer parte, de claru dominiu carbayón, nel que los de Ziganda dispunxeron de les ocasiones más clares. Col orde defensivu que caracteriza al conxuntu del NMR Carlos Tartiere, el Real Oviedo empezó a facese col control de xuegu, buscando la portería del equipu madrilanu. Nel minutu 13, col balón paráu como protagonista, Juanjo Nieto punxo un bon balón a la área, Bolaño dexó-yla a Sangalli y el donostiarra punxo'l primeru nel marcador. L'árbitru anularía'l tantu, pero'l VAR confirmó qu'esta era llegal. Gustavo y Borja dispunxeron d'otres dos ocasiones clares para ampliar la renta oviedista nel lluminosu.
Tres el pasu por vestuarios, nel que Carlos Hdez. entró por Bolaño al empiezu del mesmu, los fuenlabreños trataron de combinar pa crear peligru sobre la meta de Femenías, con un Real Oviedo que siguía buscando'l segundu tantu nel marcador. Nel minutu 56, en viendo la segunda mariella, Pathe Ciss dexaría con unu menos al Fuenlabrada, por un valtamientu a Borja Sánchez. Magar la inferioridá'l Fuenlabrada punxo l'empate nel marcador. Ziganda movió'l banquín, dando entrada a Rodri Ríos, y darréu a Borja Valle, que foi l'autor del segundu gol pa los asturianos. L'allegría nun-y duró enforma al Real Oviedo, una y bones el Fuenlabrada volvió empatar a la xugada siguiente. Nos minutos finales del choque, los carbayones buscaron el gol del trunfu, pero nun materializaron les bones xugaes que trenzaron.
Puntu que sabe a poco para'l Real Oviedo, qu'esta nueche vuelve a Uviéu y dende mañana va preparar el choque de la próxima fin de selmana énte el Real Zaragoza.
