El Real Oviedo rescata un puntu in extremis na lloucura de Montilivi

Repartu de puntos pa Girona FC y Real Oviedo nun partíu tolo que tuvo de too. Los azules punxéronse 0-2 pero'l cuadru de Michel remontó'l partíu con un doblete de Stuani y un tantu d'Ounahi. Cuando paecía que'l cuadru local llevaría los tres puntos, Carmo empató l'alcuentru na última xugada pa salvar un puntu pa los de la capital del Principáu.

Aarón Escandell, Nacho Vidal, Carmo, Costas, Javi López, Colombatto, Dendoncker, Reina, Chaira, Viñas y Rondón. Asina salió'l Real Oviedo en Montilivi. Carrión introduxo dellos cambios nel once y tamién nel sistema onde apostó por xugar d'aniciu con dos puntes. A pesar de que l'Oviedo salió bien al campu, la primer acción de peligru foi pal Girona nes botes de Roca. Aarón tuvo que realizar una gran intervención pa evitar el primeru y la reacción nun se fixo esperar. Viñas, de cabeza, punxo en apuros al meta local y acto siguíu otru remate de cabeza del uruguayanu estampóse nel bracu d'un defensor del Girona FC. L'acción foi revisada pol VAR y el colexáu señaló penalti. El "9" asumió la responsabilidá y fusiló dende los once metros a Gazzaniga pa poner el 0-1.

Dempués del pasu por vestiarios, Reina entró en llugar d'Ovie y los de Luis Carrión volvieron a golpiar. Rondón, con un testarazu axustáu, aprovechó un saqué de esquina botáu por Colombatto pa poner el segundu. Ilic y Sibo fueron los siguientes en entrar al terrén de xuegu. El partíu punxíase mui de cara pa los de la capital del Principáu anque'l Girona nun dixera la so última pallabra. Stuani, de penalti, y Ounahi, con un golazu, empataben el duelu en 20 minutos pa decepción azul. El mazazu final llegaría nel 90 col doblete de Stuani dende'l puntu de penalti. 

Cuando paecía que too taba perdíu, Carmo aprovechó un despexe de Gazzaniga pa poner el 3-3 y rescatar finalmente un puntu nun partíu tolo que tuvo de too y nel que'l Real Oviedo nun supo aprovechar la so ventaxa inicial de dos goles. Agora, y ensin tiempu pa descansar, turnu de la Copa del Rei pa vese les cares col Ourense CF.