Perdió injustamente el Real Oviedo en Ipurúa, nunu de los meyores partíos de la temporada como visitante, y estrellando dos balones nel poste y el llargueru. Foi nel minutu 93 de partíu, últimos segundos del agregu, cuando'l Eibar anotaba al refugue d'un saque d'esquina, dexando ensin siquier un puntu bien trabayáu y merecíu para'l conxuntu oviedista.
Con tres cambeos nel once con respectu al equipu titular que s'impunxo'l pasáu domingu al Málaga nel Tartiere, el conxuntu oviedista salía a Ipurúa coles mires d'aposta-y la posesión a un Eibar que nun tuvo cómodu mientres tola primer metá. Pierre, Jirka y Matheus Aiás como refrescos nel apueste por una presión alta y robos en campu rival que funcionó. Ensin demasiaes ocasiones clares, pero sí con llegaes, los de Ziganda tutearon al conxuntu armeru, ensin conceder en defensa, con un planteamientu bien seriu y trabayáu que nun-yos dexó facer a los de Garitano. Tres delles llegaes nos primeros diez minutos del partíu, la más clara quiciabes la tuvo Sangalli, qu'a centru de Pierre empalaba cola diestra directu a puerta, atrapando Yoel.
Al empiezu de la segunda metá movió banquín Ziganda, más rápidu de lo habitual. El técnicu oviedista -y dió entrada nel minutu 54 a Borja Bastón y Pombo, por Jirka y Matheus Aiás, enfrescando la banda derecha y la pareya d'ataque. Llegaba más el Real Oviedo, aprovechando los cambeos de ritmu de Pombo y atacando con munchos efectivos, sobremanera con llegaes per banda. Minutos más tarde Viti y Luismi enfrescaron la otra banda y el centru del campu. Nun cesaba l'agua intenso sobro Ipurúa, tener Lucas llegando pela so banda y cutiendo de primeres un centru de Pierre, qu'atayó la meta armeru. Dempués foi Pombo, quien estrellaba'l so centru nel poste, ensin atopar rematador. Tapó bien la defensa nun balón francu que se-y quedaba en cantu de la área oviedista al conxuntu armeru, y Ziganda escosó los cambeos cola entrada de Borja Sánchez, con poco más de cinco minutos pal noventa. Nel agregu, Pombo estrelló un potente disparu nel llargueru, n'esviando Yoel dempués de una gran espurrida. Nel 93, y tres un saque d'esquina, anotaba'l Eibar al refugue tres una primer parada de Femenías.
El Real Oviedo quedó ensin siquier un puntu que fuera xustu pol trabayu, la seriedá y valentía cola qu'encaró la visita a Ipurúa. L'equipu va entrenar mañana preparando'l choque del sábadu énte la UD Les Palmas.
