Depués de l’anuncia de la contratación de Juan Antonio Anquela como entrenador nuevu pa la temporada que vien, el Real Uviéu entaína nel restu de la planificación.
La configuración del cuerpu técnicu de la primer plantiya pa la temporada 2017/2018 ye esta:
Entrenador: Juan Antonio Anquela
Segundu entrenador: Juan José Carretero
Preparador físicu: Marcos Marcén
Entrenador de porteros: Sergio Segura
Analista Asistente: Daniel Mayo
Juan José Carretero tien una esperiencia dilatada nel mundu del fútbol. El madrilanu, que de la qu’empezaba coincidiere con Juan Antonio Anquela, trabayó como’l so segundu entrenador na so última etapa na SD Huesca. Empezó la carrera na Federación Madrilana de Fútbol, onde llogró cuatro campionatos d’España y un subcampionatu d’Europa. De siguío, Carreteru fíxose cargu del Fuenlabrada CF en Segunda División B. Nel so currículum como segundu entrenador, el técnicu madrilanu foi ayudante de Quique Hernández (ascensu a Primer División nel CD Numancia), Francisco, Máximo Hernández, Enrique Martín y Andoni Goikoetxea, con quien dexa’l CD Numancia pa marchar al Hércules d’Alicante y depués al Ceuta y selección de Guinea Ecuatorial. Tamién existió una segunda etapa na que volvió como ayudante de Máximo Hernández, nel Albacete, y dirixió tamién l’Atlético de Madrid Fémines. Primero d’incorporase con Juan Antonio Anquela a la SD Huesca, Carretero probó suerte nel fútbol chinu, y volvió pa España directu al conxuntu oscense.
Marcos Marcén va incorporase a la entidá carbayona como preparador físicu. Ye graduáu en CCAFD y tien con un Máster en Preparación Física nel Fútbol. Depués de la so etapa como readaptador na SD Huesca, incorporóse al cuerpu técnicu d’Anquela ocupando’l puestu de preparador físicu.
Sergio Segura, entrenador de porteros del Real Uviéu, va siguir una campaña más al mandu de los porteros de la primer plantiya, amás de coordinar l’área de porteros de la cantera uviedista. Va ser el so cuartu añu na entidá.
Dani Mayo, nacíu n’Arxentina, con nacionalidá española, va ser el técnicu analista y asistente. Depués de la so etapa como xugador, onde se consolidó na Primer División Arxentina, dio’l saltu a España y llegó a militar en Primer División, nes files del CD Numancia. Na so etapa como técnicu foi segundu entrenador de Fabri na SD Ponferradina (Segunda División) y tamién al llau de Rafa Berges na UD Logroñés. Los sos principios foron nel fútbol base valencianu. Dani Mayo llega al Real Uviéu como analista asistente de Juan Antonio Anquela.
D’esta manera, Juan Antonio Anquela y el so equipu van empezar la pretemporada’l llunes 10 de xunetu, nes instalaciones deportives d’El Requexón.
