El Real Uviéu, depués de comunicase ayeri cola Real Federación Española de Fútbol y el Real Sporting de Xixón, pola mor de la muncha agua que cayó nestos díes, amás de la previsión meteorolóxica prevista pa les próximes 48 hores y l’estáu actual del terrén de xuegu del Carlos Tartiere, solicitó l’aplazamientu del partíu que teníen que xugar el filial uviedista y el Sporting B esti domingu nel estadiu uviedín.
La Real Federación Española de Fútbol acaba de comunicar a dambos clubes que’l partíu aplazóse y que nos díes vinientes ha llegase a un alcuerdu pa poner fecha y hora nueves pa xugalu.
Los aficionaos uviedistes que retiraren entraes p’asistir a esti alcuentru van poder recuperar l’importe de la localidá diendo a partir del llunes a les oficines del Carlos Tartiere.
Los aficionaos que quieran más guardar la entrada a la espera de que se ponga una fecha nueva pa la disputa del partíu van tener que descambiar la entrada yá adquirida por otra localidá cola fecha y hora nueves desque se decidan.
