El entrenador del Real Oviedo, Guillermo Almada, compareció en rueda de prensa tres la derrota por 0-1 ante l’Atlético de Madrid nel Carlos Tartiere, un partíu marcáu pola eficacia rojiblanca y la falta d’aciertu local a pesar del bon xuegu despregáu polos asturianos.
El técnicu azul defendió con firmeza’l rindimientu del so equipu y lamentó un resultáu que, al so xuiciu, nun reflexó lo asocedíu sobre’l céspede.
Almada destacó’l trabayu colectivu del Oviedo y subrayó la diferencia ente’l desenvolvimientu del alcuentru y el marcador final. “Hay que felicitar a los xugadores pol gran partíu que fiximos. Fiximos méritos y tuvimos cerca, pero nun pudimos marcar y Oblak tuvo una gran actuación. El so únicu tiru a puerta foi gol”.
El entrenador insistió en que la derrota resulta especialmente dura pola imaxe ufiertada: “Si repetimos actuaciones como la de güei vamos tar muncho más cerca del trunfu. Pasó más d’una vez y los méritos nun suben al marcador, pero hai que siguir nesti camín”.
El técnicu uruguayu reconoció que l’impactu emocional tres el partíu foi evidente dientro del vestiariu. “Tán golpeaos por tolos méritos que fixeron, anque supiéramos que l’Atlético te pue desanivelar en cualquier momentu”.
Sicasí, pidió fortaleza mental pa afrontar lo que vien: “Hay que llevantase y ser fuertes porque a vegaes l’esporte ye inxustu, como lo foi güei. L’entrega y el fútbol que amosamos foi mui bonu y por momentos superamos a un rival con muncha calidá”.
El próximu compromisu lligueru cobra agora una dimensión decisiva pal conxuntu carbayón. “Ensin dulda ye’l partíu más trascendente que tenemos. Ye definitoriu pa nós, tenemos que ganar como seya y nun allonxanos de tolo bonu que tamos faciendo”.
Almada tamién agradeció’l sofitu de la afición, que despidió al equipu ente aplausos a pesar de la derrota.
El entrenador azul refirióse amás a les pallabres elogioses del técnicu rival, Diego Simeone. “La derrota golpiate, pero tenemos que dar-y la vuelta a la situación. Los que sabemos de fútbol sabemos que esto pue pasar. Al Cholo, agradez-y lo que dixo sobre mí”.
La rueda de prensa completa darréu:
