El Real Oviedo continúa cola so axenda d'actividaes na selmana del centenariu con una cita de gran valor académicu y deportivu. Esti xueves 26 de marzu, coincidiendo colos 100 años d'historia de la entidá azul, la ciudá d'Uviéu acoyó'l Congresu de Medicina y Deporte, enmarcáu dientro del XIV Congresu Internacional en Ciencies del Deporte organizáu pola Universidá del Fútbol de Pachuca.

Por primer vegada, esti prestixosu alcuentru celebróse na capital asturiana, consolidando a la institución azul como un referente non solo nel ámbitu deportivu, sinón tamién na promoción del conocimientu y la formación especializá.

El congresu xuntó a destacaos profesionales del ámbitu sanitariu y deportivu. Entre los participantes tán representantes de los Servicios Médicos del Real Oviedo, el FC Barcelona y l'Atlético de Madrid, xenerando un espaciu d'intercambiu d'esperiencies y avances na medicina aplicada al deporte.

Asina mesmu, l'eventu cuenta cola presencia d'estudiantes de Medicina de la Universidá d'Uviéu, asina como alumnos internacionales, reforzando la so dimensión formativa y global.

Unu de los momentos más destacaos de la xornada foi la charra maxistral de Toni Nadal, figura de referencia nel deporte d'altu nivel, a la que asistieron representantes de toles disciplines del Real Oviedo y la so Fundación.

Esta iniciativa enmárcase dientro del compromisu del Real Oviedo col desarrollu integral del deporte y la xeneración de conocimientu, nuna selmana histórica na que la entidá celebra un sieglu d'orgullu, trayeutoria y unión cola so ciudá.