Esti xueves 26 de marzu, coincidiendo cola celebración de los 100 años del Real Oviedo, tuvo llugar nel Carlos Tartiere la presentación del documental oficial del centenariu, Orgullu, Valor y Garra: 100 años del Real Oviedo, producíu por Informe Plus de Movistar. La cita supón la primer proyección pública d’una obra concebida pa preservar la memoria emocional del Club, cuntando la so hestoria al traviés de quienes la fixeron posible.

L’estrenu tamién cuntó cola asistencia de los neños y neñes ganadores del certame “Microrrelatos 100 Años del Real Oviedo”, quienes, baxo la entruga “¿Qué ye pa ti’l Real Oviedo?”, compartieron los sos valores, la so pasión y la conexón única que sienten col equipu carbayón.

Un sieglu dempués, el Real Oviedo nun solo celebra la so hestoria, sinón tamién la fuercia de quienes la fixeron posible. Dende los goles llendarios d’Isidro Lángara hasta la maxa eterna de Santi Cazorla, pasando por xeneraciones de xugadores que defendieron l’escudu con pasión, el Club sobrevivió a momentos críticos y medró gracies a la entrega de la so afición. Esa hinchada fiel, que estuvo al llau del equipu nos díes más difíciles, güei conviértese en protagonista de la celebración, demostrando que l’espíritu azul tresciende xeneraciones y que’l lema “orgullu, valor y garra” nun ye solo un documental, sinón l’essencia viva del Real Oviedo.

Con esta pieza audiovisual, el Club pon en valor un sieglu d’hestoria, recuerdos y emocioes que forxaron la so identidá. Una obra que nun solo preserva la memoria de los sos protagonistas y los sos momentos más emblemáticos, sinón que tamién reflexa la pasión, la resiliencia y los valores que definieron al Real Oviedo, consolidando’l so lleáu y recordando que cada capítulu d’estos cien años ye una pieza imprescindible de la so hestoria azul.