Puntu d'enforma méritu en Leganés. El Real Oviedo encaraba nesta ocasión la xornada númberu 10 de LaLigaHypermotion y fízolo viaxando hasta Madrid para midise al conxuntu pepinero en Butarque. El combináu de Luis Carrión llegaba en racha a esti partíu tres dos victories y l'entrenador catalán apostó nuevamente por un once formáu por: Lleo Román, Abel Bretones, David Costas, Dani Calvo, Oier Luengo, Colombatto, Luismi, Seoane, Viti, Paulino y Borja Bastón.

Arrincó l'alcuentru y dende el primer momentu pudo reparase qu'el de güei nun sería un alcuentru fácil. Los locales trataben de faer dañu al cuadru uvieín y Leo Román tuvo que realizar una parada de méritu nos primeros intres para evitar el primeru. Magar ello, el conxuntu de la capital del Principáu d'Asturies empezó a espurrise col pasu de los minutos y Bastón, nuna llegada per banda, metió'l mieu nel cuerpu de l'afición madrilana.

La igualdá reinó nos primeres 45 minutos y el 0-0 imperaba nel marcador. Tres la continuación, Camarasa, Cazorla y Sebas Moyano ingresaben al terrén de xuegu para tratar de que l'equipu diera un pasiquín más sobro'l campu. La igualdá rescampló mientres el segundu periodu y les ocasiones de gol tuvieron ausentes. Magar ello, el Real Oviedo intentólo hasta'l final y demostró nuevamente ser un equipu sólidu y bien trabayáu.

Con esti empate, el combináu de Luis Carrión cierra una selmana casi perfecta en sumando 7 de los postreros 9 puntos posibles. L'equipu, que va folgar el domingu, va tornar a los entrenamientos el próximu llunes a partir de les 10:30 hores pa empezar a preparar el so próximu compromisu ligueru énte l'Albacete.