Arrincó l'alcuentru de la meyor forma posibles para los uvieinos. Minutu 4 de partíu y el carbayones yá teníen la más clara para ponese per delantre nel marcador. Luismi, tres un córner llanzáu por Colombatto, remataba al llargueru y metía el mieu nel cuerpu de l'afición visitante.

El Real Oviedo trató de llevar la iniciativa mientres los primeres 45 minutos anque un Albacete bien llantáu nun-y pudo les coses nada fáciles. Cuando paecía que diríamos al descansu ensin nenguna novedá, Álvaro R. yera espulsáu por doble mariella y dexaba al conxuntu manchegu con un xugador menos sobro'l terrén de xuegu.

Tres el pasu por vestuarios, los azules salieron con una marcha más y conscientes de que teníen que dar un pasu adelantre. Nel 48´, una falta llanzada por Colombatto terminó col primer gol de Paulino. El cántabru remató de cabeza a la perfección y punxo el 1-0 nel marcador por que el Tartiere estallare de felicidá. Cuatro minutos más tarde, l'allegría nun cesaría yá que Borja Bastón ampliaba la ventaya y ponía el 2-0 tamién cola cabeza. El municipal uvieín esfrutaba del xuegu esplegáu polos suyos y Paulino siguía cola so fiesta particular. Segundu para la so cuenta personal y la goliada yá yera xuna realidá.

Dempués de los trés tantos, Luis Carrión decidió mover el banquín y dio entrada a Cazorla, Sesé, Romario Ibarra y Camarasa. L'amplia ventaya cola que cuntaben los azules fixo que la postrera media hora d'alcuentru trescurriera con tranquilidá. Con esti trunfu, l'equipu suma diez de los postreros dolce puntos posibles y traviesa el meyor momentu no que va de temporada. Tres esti alcuentru, l'equipu yá piensa na próxima xornada liguera na que se va ver les cares cola SD Amorebieta.