El Real Oviedo presentó esti xueves, 3 de setiembre, nel Estadiu Carlos Tartiere a David Jiménez y Mikel Goti como nuevos futbolistes del conxuntu azul. L'actu contó cola presencia del direutor deportivu de la entidá, David Fernández, que acompañó a los xugadores na so puesta de llargo como xugadores carbayones.

"Pa mí ye un pasu hacia alantre na mio carrera. Vengo a un club históricu y defenderé a muerte esta camiseta", declaró en primer llugar Mikel Goti. "Creo que la mio posición ideal ye la mediapunta anque pueo xugar n'otres posiciones del centru del campu", añadió.

Pela so parte, David Jiménez tamién manifestó la so alegría por llegar a Uviéu. “Sé de la esixencia d'esti club. Muy contentu d'estar equí. Nun miro los xugadores de cada posición. Namás busco ayudar en too lo que me pida l'entrenador", manifestó.

Dempués de la comparecencia de los dos futbolistes, David Fernández, direutor deportivu azul, tomó la pallabra y valoró'l mercáu de fichaxes del Real Oviedo. "Gran nivel de satisfacción pola plantiya. Truximos a los xugadores que queríemos. Tenemos una plantiya a la altura del club que representamos. A día de güei tenemos el númberu y calidá de xugadores que queríemos", comentó.

Puedes ver la rueda de prensa completa y la intervención de David Fernández equí: