Tal día como güei, un 21 d'abril, nel añu 1926, el Real Oviedo entrenábase per primer vegada, cuando nun yera pasáu nin un mes dende la fundación de la entidá.

La sesión d'entrenamientu celebróse nel estadiu de Vetusta, feudu que yera del Real Stadium Club Ovetense hasta que esta entidá se fusionó col Real Club Deportivo d'Uviéu pa fundar el Real Oviedo.

Esa primer sesión preparatoria desenvolvióse ensin entrenador, yá que'l club nun contratara entá nengún técnicu. El primer entrenador de la entidá, Frederick Pentland, sería contratáu a primeros de xunu d'esi añu.

A falta d'entrenador, los primeros entrenamientos foron organizaos por dos direutivos, Francisco Martínez y Francisco Arias de Velasco. Óscar, César, Trucha, Comas, Mariscal, Calichi, Xustu, Cubanu, Mieres, Duarte, Esparza y Sancho foron dalgunos de los xugadores que s'exercitaron aquel primer día.

Xunto a ellos, entrenáronse tamién Laureano, Alfonso, Emilio Menéndez, Paladini, Eulogio, Matías, Barril, Tiesu II, Leto, Pepín, Servando, Bujanda, Muslera, Paulino Álvarez, Obdulio Velasco y Avilesu.

En total, 28 futbolistes, 28 nomes que pasaron a la hestoria por participar n'aquel primer entrenamientu. Tres una selmana y media de sesiones preparatories, el Real Oviedo disputaría los sos primeros partíos, de calter amistosu, el 1 y el 2 de mayu, dambos frente al Arenas de Guecho nel estadiu de Vetusta.