Ganes de volver regala-y un trunfu al Carlos Tartiere. Con ese oxetivu llegaba'l Real Oviedo al so alcuentru énte'l Granada CF d'esti sábadu nel municipal uvieín. Tres la goliada en Ferrol, el conxuntu uvieín salió con una inyección d'optimismu a un choque pal que Javi Calleja allinió'l siguiente once: Aarón Escandell, Pomares, Oier Luengo, Costas, Dani Calvo, Sibo, Colombatto, Cazorla, Hassan, Chaira y Viñas.

 

Salió bien al alcuentru'l Real Oviedo. La intensidá taba presente nes primeres acciones y los locales demostraron querer mandar ya imponer el so ritmu dende l'entamu. Nel primer cuartu d'hora, la más clara pa los asturianos llegó al traviés d'una falta a balón paráu. Cazorla punxo con tola intención al segundu palu pero nengún atacante azul llegó ende pa rematar. Chaira, per banda esquierda, trataba de desfacer de la so marca y poner centros a la área anque la zaga nazarí alloñaba'l peligru. Tamién lo intento'l cuadru carbayón dende'l córner y n'acciones a balón paráu anque l'empate foi finalmente la resultancia col que diríamos al descansu.

 

Tres el pasu por vestuarios, Colombatto tuvo una doble ocasión pa facer el primeru pero'l tantu nun llegó. Un disparu dende la frontera de la área y un acción perclara ensin porteru fueron esbardiaes pol arxentín que minutos más tarde sí tendría finalmente'l premiu del gol. Sebas y Paulino entraron al campu nel 74´ en busca de los trés puntos y dos minutos más tarde el Tartiere cantó gol. Portillo, qu'ingresara nel terrén de xuegu nel minutu 65 al pie de Paraschiv, punxo'l 1-0 pero'l so tantu foi anuláu per fora de xuegu. 

 

La insistencia carbayona nun cesó y el premiu del gol terminó llegando. Penalti claru sobro Sebas Moyano y gol de Colombatto dende los once metros pa desamarrar la llocura del municipal uvieín. Yá nel 85´, Paraschiv sentenció'l choque con un gran gol pa poner el segundu y definitivu gol del alcuentru. 

 

Mañana, vuelta al trabayu pa empezar a preparar dende yá'l próximu compromisu ligueru énte'l Real Zaragoza.