El legáu material d'Isidro Lángara podrá ser contempláu pol gran públicu nel estadiu Carlos Tartiere indefinidamente en virtú del alcuerdu rubricáu güei ente la so familia y la Fundación Real Oviedo.

Una coleición única d'oxetos del meyor goleador español de tolos tiempos constitúi dichu legáu, que se muestra estos díes na esposición Lángara, el Señor de los goles, la cual ta nel claustru altu del Edificiu Históricu de la Universidá d'Uviéu.

Nel marcu de dicha muestra efectuóse güei la xenerosa cesión del legáu material de Lángara por parte de la so familia, el deséu de la cual ye que la coleición pueda ser contemplada pol mayor númberu posible d'aficionaos al fútbol.

Por parte de la familia del futbolista asistió Junkal Guerrero Lángara, ente que por parte del Real Oviedo y la so Fundación tán presentes el so presidente, Martín Peláez; el so vicepresidente, Manuel Paredes; el so direutor, César Martín; y el so responsable de Patrimoniu Históricu, Miguel Sanz.

El legáu ta integráu por medalles, plaques, insignes, semeyes, publicaciones y dellos oxetos personales que primero el mesmu Lángara y dempués la so familia conservaron a lo llargo de décades.  

La muestra Lángara, el Señor de los goles, organizada pola Fundación Real Oviedo y la Fundación Iberoamericana Asicom, va tar abierta hasta'l 1 d'abril nel Edificiu Históricu de la Universidá d'Uviéu.

Isidro Lángara Galarraga ta consideráu el meyor goleador español de tolos tiempos pola Federación Internacional d'Hestoria y Estadística de Fútbol. Suyos son entá güei en día la meyor media de goles por partíu na Primer División d'España y el meyor promediu goleador cola seleición española.