El Real Oviedo abría nesta ocasión la xornada númberu 17 de LaLiga Hypermotion y fízolo recibiendo en casa a la SD Huesca. Los uvieinos queríen tornar a la sienda de la victoria y escaecer cuanto antes lo d'Elche. Por ello, Javi Caleya allinió un once formáu por: Aarón Escandell, Oier Luengo, Dani Calvo, Mariñes, Rahim, Colombatto, Seoane, Cazorla, Sebas Moyano, Hassan y Alemão.

 

Nun salió bien al partíu'l cuadru carbayón. Dempués d'unos minutos de tantéu, l'ex oviedista Sergi Enrich aprovechó la oportunidá y adelantró a los suyos con un tanto que ponía'l 0-1 nel marcador. Alemão trató d'igualar el partíu cuanto antes pero'l so remate, nuna posición bien favorable, colóse incomprensiblemente percima del travesal. Nel 29', Hassan, tres una bona xugada individual por derecha, tamién probó fortuna pero'l so remate foise bien esviáu. 

 

Los últimos minutos del primer periodu trescurrieron ensin nada destacable. El balón yera pa los nuesos anque ensin nenguna ocasión manifiesta que destacar. Descansu. Tres el pasu por vestuarios, el choque nun pudo ponese peor. Segundu gol de Enrich y 0-2. Paraschiv, Viñas y Chaira entraron al campu como revulsivos anque la cosa nun camudó. Un palu de Oier, nel 56´, y un remate de Chaira de cabeza que tamién s'estrelló na madera pudieron meter de llenu nel partíu al Real Oviedo pero la fortuna tampoco taba del llau carbayón. 

 

Yá nel minutu 81´, Joaquín Muñoz punxo'l terceru y definitivu pa cerrar el choque. Mal partíu en llínees xenerales d'un Real Oviedo que va buscar desquitase ante'l Racing de Ferrol la próxima xornada y volver asina a realcontrase cola victoria.