El Real Oviedo sumó un nuevu puntu nel Carlos Tartiere tres empatar ensin goles frente a Osasuna (0-0), nun alcuentru nel que los de Luis Carrión fixeron méritos abondes pa llevase la victoria. El cuadru carbayón firmó un partíu seriu, con dominiu en delles fases y coles meyores ocasiones mientres los 90 minutos, pero la falta de puntería evitó que los tres puntos quedaren en casa.

Dende los primeros minutos, el Real Oviedo salió decidíu, presionando bien enriba y amosando una intensidá notable. Corría'l minutu 2 cuando Ilyas dispuso nes sos botes de la primer gran oportunidá del alcuentru con un disparu a bocaxar que obligó a Sergio Herrera a realizar una intervención de méritu.

Col pasu de los minutos, Osasuna intentó reaccionar y xeneró peligru a balón paráu. Aarón Escandell apaeció con una gran mano pa desbaratar na llinia un remate de Budimir tres una falta llateral executada por Rubén García. A pesar del empuje de los rojillos, los de Luis Carrión calteníen la iniciativa, con llegaes de Rondón y Ilyas que pudieron abrir el marcador enantes del descansu.

La segunda metá caltuvo la mesma tónica: un Real Oviedo queriendo dominar, valiente y volcado sobre l'área contraria. L'escuadra oviedista apretaba a Osasuna, imponiendo ritmu y xenerando peligru poles bandes.

L'ocasión más clara llegó pasada la hora de xuegu. Un centru precisu de Javi López pescólu Viñas pa rematar prácticamente a plazer, pero el balón marchó per enriba del travesaño. L'Oviedo, firme atrás, apenas concedió, con una intervención clave del llateral izquierdu pa evitar el remate francu de Budimir yá na recta final. 

L'alcuentru tamién dexó una de les notes más ilusionantes de la xornada como'l debú oficial en Primera División de Pablo Agudín. El canteranu oviedista amosó la so personalidá yá dende'l primer balón que tocó, protagonizando una gran conducción en cuanto s'incorporó al terrén de xuegu. El ‘27’ tuvo participativu y mui activu nes aiciones ofensives del tramu final.

Con esti empate, el segundu de la temporada, el Real Oviedo algama los ocho puntos y queda a namás ún de los puestos de salvación. Un puntu que sabe a poco tres lo vístu nel Tartiere, pero que refuerza les bones sensaciones y el medrar del equipu nes caberes xornaes.