El Carlos Tartiere vistióse de gala para encarar el primer derbi asturianu de la temporada 2023/2024. El Real Oviedo llegaba a esti alcuentru col gran oxetivu de collechar la primer victoria de la campaña y para ello Álvaro Cervera allinió un once formáu por Leo Román, Viti, Oier Luengo, Dani Calvo, David Costas, Abel Bretones, Luismi, Seoane, Sebas Moyano, Paulino de la Fuente y Borja Bastón.

Empezó l'alcuentru y dende el primera notóse que yera un derbi asturianu. Los azules, col mesmu sistema qu'emplegaron na Ciudá de Valencia, caltuvieron la so solidez defensiva y trataron de facer dañu a la contra y per banda. Cuando entrábamos nel minutu 18 d'alcuentru llegaría la primer acción de peligru para los nuesos. Sebas Moyano buscó un centru chut que se foi llixeramente esviáu de la meta visitante.

El "17" comandó la mayoría d'ataques de los de Cervera nel primer tiempu y foi un peligru constante mientres los primeres 45 minutos. Nel 29', una gran xugada personal del estremu llevantó a los oviedistas de los sos asientos anque'l so remate, en tocando nun defensor, nun terminó de ver portería. El protagonista de los últimos intres del primer periodu foi'l Real Oviedo anque'l 0-0 sería la resultancia col que colaríamos al descansu.

Tres la continuación, el carbayones saldríen con una marcha más y daríen un pasu adelantre énte un Sporting de Xixón qu'apenes s'averó sobre la meta de Leo Román. La superioridá foi constante mientres la mayor parte de los segundos 45 minutos anque ensin ocasiones demasiao clares. Nel 65´, una perda nel campu del conxuntu xixonés provocó un contragolpe bien claro para los de Cervera anque Bastón nun terminó de rematar la ocasión.

Cuando'l Real Oviedo tuvo los sos meyores minutos llegó la única acción con peligru del equipu de Miguel Ángel Ramírez. Cote, con un remate dende fora de la área, a puntu tuvo d'abrir el marcador. Sicasí, el so disparu colóse llixeramente esviáu del poste derechu. Na recta final del alcuentru, los uvieinos volvieron a intentalo al traviés d'acciones a balón paráu y con centros llaterales pero'l gol nun terminó por llegar. Pitíu final y el 0-0 foi finalmente la resultancia que imperó nel lluminosu.

El combináu de la capital del Principáu d'Asturies va tornar mañana a los entrenamientos para empezar a preparar el so próximu compromisu ligueru énte'l FC Andorra.