El capitán del Real Oviedo, Dani Calvo, compareció ante los medios de comunicación pa facer balance de les primeres selmanes de pretemporada y na selmana na que'l equipu va enfrentase al Deportivo de La Coruña nel Carlos Tartiere.

El central azul destacó la intensidá cola que se ta desarrollando'l trabayu dende'l primer día. "Ta siendo una pretemporada bien intensa. El entrenador inculcónos esa enerxía y esa intensidá tolos díes. El modelu de xuegu ta encaxando mui bien y tenemos munches ganes de xugar el sábadu ante la nuestra xente pa amosar el trabayu que tamos faciendo", señaló.

Calvo tamién puso en valor la combinación d'esperiencia y mocedá que presenta la plantiya esta temporada. "Xuntar l'esperiencia cola mocedá ye bien positivu. Ta produciéndose un relevo xeneracional con xente que vien con munchu fame y que tien munches ganes de facer al Real Oviedo entá más grande", afirmó.

Sobre la preparación estival, el capitán esplicó que'l cuerpu técnicu ta apostando por una metodoloxía na que'l trabayu físicu y el tácticu van de la mano. "En munches pretemporades priorízase namái l'aspectu físicu, pero'l míster intentó xuntar el trabayu físicu col tácticu. Tien un modelu de xuegu bien marcáu y intenta que lo interioricemos dende'l primer día", destacó. 

Por último, y cuestionáu pola retirada de Santi Cazorla, el capitán señaló que "triste, porque sabemos lo que ye Santi pal fútbol y pal Oviedo. Cuando se fixo pública enteréme y entristecióme. Dempués piénsalo con perspectiva y siento que soi un gran afortunáu por compartir tres años de carrera con él y creo que nun somos conscientes de lo que supunxo tenelu y les masterclass que dio entrenando y xugando. Foi transversal pal club, al marxe de lo deportivo, namái la so imaxe fixo meyorar al club en munchos departamentos del club como marketing, comercial o comunicación y ye bien difícil tener un xugador asina. Deseyar-y los mayores ésitos nel futuru, sería un lluxu tenelu equí. Namái podemos deseyar-y lo meyor a él y a la so familia".