Nueva xornada de LaLiga Hypermotion para'l Real Oviedo. Dempués del alcuentru n'El Plantío, los azules volvíen xugar llueñe del Carlos Tartiere col claru oxetivu de collechar la primer victoria de la temporada. Nesta ocasión, el conxuntu uvieín mediar al Llevante UD na Ciudá de Valencia nun partíu para'l qu'Álvaro Cervera optó por un once formáu por Leo Román, Lluengo, David Calvo, David Costas, Abel Bretones, Viti, Luismi, Colombatto, Sebas Moyano, Paulino y Borja Bastón.

 

Salió coles idees bien clares el combináu carbayón dende'l primer minutu y Paulino de la Fuente sería l'encargáu de meter el mieu nel cuerpu de l'afición local con un bon remate dende la frontera, nel minutu 10, que se coló llixeramente esviáu percima del llargueru. El sistema de trés centrales instauráu nel campu daba los sos frutos y el Llevante nun llograba xenerar acciones de peligru sobro la meta de Leo Román. Cuando averábamos a la media hora de partíu, Borja Bastón tendría les más clara. Remate preciosu del madrilanu na área, tres un bon centru de Sebas Moyano, que s'estrellaba nel poste de la meta defendida por Joan Femenías. El 0-0

siguía instauráu nel marcador.

 

Les llegaes más peligroses del primer actu siguíen siendo pal Real Oviedo pero'l gol nun terminaba de llegar. Bastón, nuevamente, aprovechaba una gran xugada de Viti  per banda derecha pa poner n'apuros otra vegada a el ex porteru del conxuntu azul n'otra clara ocasión pa los de Cervera. Magar los acercamientos, la resultancia nun se movió y l'empate ensin goles foi'l marcador col que'l choque foise al descansu.

 

La continuación del segundu tiempu sirvió por que se fixera xusticia y el Real Oviedo poníase, merecidamente, per delantre nel marcador. Colombatto sirvía un balón precisu a Dani Calvo nel corazón de la área para fuera'l defensa l'encargáu d'asistir a Bastón, que remataba a prestar pa poner el 0-1. Les bones noticies pa los intereses azules duraríen poco yá que dos minutos más tarde Santiago Colombatto era espulsáu en viendo la segunda mariella. L'arxentín abandonaba'l terrén de xuegu en viendo dos tarxetes bien discutíes que dexaben a los de la capital del Principáu d'Asturies con un xugador menos sobro'l campu.

 

Jimmy entró al campu por Paulino de la Fuente pa reorganizar al equipu y un nuevu partíu empezaba na Ciudá de Valencia. La diferencia numbérica ente

dambos conxuntos foi notable mientres el segundu periodu y Bouldini, nel 64, anotaba'l tantu del empate. Los asturianos trataben d'aguantar les llegaes de los locales anque Oier Luengo, nel 75, tendría la más clara delos segundos 45 minutos. Una falta llateral botada por Sebas Moyano era cabezada pol central, tres l'allongamientu de Dani Calvo, pero'l so remate cutía'l travesal. La mala suerte volvía apaecer y negába-y el tantu de la victoria a los uvieinos.

 

Cuando l'alcuentru entró na recta final, Masca foi baltáu dientro de la área anque'l colexáu nun señaló nada magar les protestes de los d'Álvaro Cervera. Yá nel descuentu, el Llevante UD trató de marcar el tantu de la victoria pero'l Real Oviedo aguantó y llogró sumar un puntu que sabe a poco polo visto sobro'l terrén de xuegu.