Aarón Escandell compareció esti miércoles ante los medios de comunicación na selmana del estrenu lligueru del Real Oviedo, que va afrontar el so primer partíu de la temporada contra'l Granada CF. El guardameta azul repasó la so renovación col conxuntu oviedista, el nuevu proyectu deportivu y la importancia de construir un vestiariu xuníu pa afrontar el cursu.

Escandell entamó amosando'l so agradecimientu pola confianza recibida tres prorrogar la so vinculación col club. El porteru quixo destacar el papel de toles partes implicaes nel alcuerdu y aseguró que la so continuidá siempre foi la so prioridá. “Agradezco a toos, al Grupu Pachuca, al Real Oviedo, a la direición deportiva y a toos. La negociación nun se tensó nunca. Yera'l sitiu onde quería tar yo y la mio familia. Atopéme equí como en nengún sitiu”, señaló.

El guardameta considera que'l contestu actual poco tien que ver col de va dos temporaes y apuesta por mirar hacia alantre. “Nun hai que volver la vista atrás. Hai dos años yeren otres cares y otru cuerpu técnicu. Agora tenemos un equipu nuevu y poco a poco van dándose los frutes pa llegar de la meyor forma al primer partíu de lliga”, apuntó.

Unu de los mensaxes principales d'Escandell xiró en torno a la unidá del grupu. El porteru esplicó que'l cuerpu técnicu insiste na necesidá de construir un equipu sólidu en tolos aspectos, tanto dientro como fuera del terrén de xuegu.

“Pídenos que seamos un grupu bien xuníu. Si cai ún, caemos toos. Si se lleventa ún, llevantámonos toos. Un equipu en tolos aspectos”.

La llegada de nuevos futbolistes supunxo una renovación importante de la plantiya, pero Escandell entiende que la clave va tar en algamar que tolos integrantes del vestiariu funcionen como un bloque enantes d'afrontar la competición.

El porteru tamién tuvo palabres de reconocencia pa Narváez, destacando tanto la so faceta personal como l'esfuerciu que fixo pa compaxinar el fútbol colos sos estudios.

“Ye una gran persona, un rapaz bien trabayador. L'añu pasáu sacó la carrera, compitió col filial y estuvo con nós, y eso ye bien difícil”.

Escandell considera que'l mozu guardameta ta nun contestu ideal pa siguir progresando. “Que disfrute, ta nun llugar idóneu pa crecer. Hai una competencia bien sana y llevámonos bien”, añadió.

Más allá de lo estrictamente deportivu, Escandell reconoció que la so vinculación con Uviéu tresciende al fútbol. El guardameta puso en valor el cariñu recibíu dende la so llegada y la conexón que estableció cola ciudá y cola afición. “Lo que me fixo sentir esta ciudá, esta afición, nel emocional y nel deportivu, nun lo sentí en nengún sitiu”, concluyó.