Un grupu de 23 alumnos de la Brigham Young University, d’Estaos Uníos d’América, institución académica que soscribió un conveniu col Real Uviéu, visitó les instalaciones del club y conoció los xugadores del primer equipu.
Los estudiantes visitaron ayeri l’estadiu Carlos Tartiere, onde entraron al terrén de xuegu, los vestuarios, la sala de prensa y el Muséu del Real Uviéu. Conocieron enriba’l terrén daqué más de la historia del club, del que yá sabíen delles coses; sobre manera tolo rellacionao cola ampliación de capital del 2012 que significó la salvación de la institución, la llegada del Grupu Carso y la universalización de la entidá.
Na mañana de güei, equipaos con camisetes del Real Uviéu que la so universidá adquirió na tienda del club, foron a El Requexón pa ver l’entrenamientu del primer equipu y, n’acabando la sesión preparatoria, charrar colos xugadores y sacar delles semeyes con ellos.
Va poco, la Brigham Young University y el Real Uviéu firmaron un conveniu de collaboración. Con esti alcuerdu, la universidá beca a dalgunos de los sos alumnos pa realizar práctiques nel Real Uviéu.
La Brigham Young University, que la so sede ta na ciudá de Provo, n’estáu de Utah, ye una universidá bien prestixosa fundada en 1875 y qu’anguaño cunta con unos 30.000 estudiantes.
