Con una auténtica revolución nel once titular, dende’l cambéu de porteru hasta l’esquema, con dos puntes de mano, Anquela llogró una gran reacción nun Real Uviéu qu’atopó un Tartiere fríu nos primeros quince minutos de partíu, pola protesta de los aficionaos del Fondu Norte, que nun entraron al estadiu hasta’l minutu 14, pero fixo méritos pa enganchar a los presentes y pa dexar finiquitáu l’alcuentru na primer metá.
Con criteriu, toque y llegada, el primer avisu foi de Bárcenas, asitiáu na carril derecha, con un remate nel minutu un de partíu que marchó esviáu por poco. A los nueve minutos llegaba’l gol d’Ibra, nun balón colgáu al área de Tejera que l’ariete namás tuvo que cabeciar p’anotar l’un a cero, poniendo de cara’l partíu. Siguió’l dominiu uviedista, en xuegu y ocasiones, y la siguiente túvola Folch nun bon remate qu’aparó Perera y unvió a córner. Túvola tamién Carlos Hernández, pero unvió fuera’l remate de cabeza nuna falta botada por Saúl Berjón. La postrera foi de Tejera, que sacó un bon disparu qu’atayó Perera, pa volver intervenir nel remate d’Ibra al refugue.
Na segunda metá los primeros minutos foron meyores pal Mallorca y el Real Uviéu pagólo caro. Lago Junior anotaba n’área pequeña y ponía l’empate. A partir d’ende, el Real Uviéu volvía reaccionar. Anquela dába-y entrada a Javi Muñoz por Joselu y retiraba a Saúl, que coló con molesties, por Boateng. El Real Uviéu llegaba con facilidá, pero nun materializaba. Tuviéronla Boateng, Ramón Folch, Ibra y Bárcenas..., pero a la fin tuvo qu’intervenir Champagne, col Real Uviéu entornáu n’ataque, salvando un mano a mano y el puntu pa los azules.
