El Real Oviedo sumó un puntu na so visita al campu del RCD Espanyol nun alcuentru que finó con empate (1-1) y que dexa sensaciones enfrentaes pa los de Guillermo Almada, que necesitaben la victoria pa recortar puntos cola permanencia.
El partíu nun pudo entamar meyor pal conxuntu carbayón. Nel minutu 8, una gran xugada de Thiago Fernández finó col balón nos pies de Reina, que nun perdonó pa adelantar al Real Oviedo y firmar el 0-1. Un entamu ideal pa los azules, que salieron al céspede cola clara intención de buscar un trunfu vital na llucha pola permanencia.
Dempués del tanto oviedista, l’Espanyol reaccionó y entamó a volcarse sobre la portería defendida por Aarón. El conxuntu local acumuló delles llegaes peligroses y el guardameta azul tuvo que intervenir en delles ocasiones con parades de méritu pa caltener la ventaxa. Sicasí, pasada la media hora de xuegu, Kike García llogró alcontrar el premiu pa los pericos y anotó el tanto del empate, resultáu col que dambos equipos marcharíen al descansu.
Dempués de la reanudación, Guillermo Almada movió el banquillo en busca d’un pasu alantre n’ataque. Nel minutu 56 introdució un triple cambiu cola entrada de Colombatto, Ilyas Chaira y Hassan pa tratar d’aportar mayor fondura ofensiva al equipu. L’Espanyol, pola so parte, tamién buscó’l segundu gol col oxetivu de cortar cuanto enantes la so mala racha de resultaos.
La ocasión más clara del segundu tiempu pa los azules llegó nes botes de Viñas, que protagonizó una bona xugada individual y probó suerte con un disparu dende fuera del área, anque’l so remate marchó desviau. El conxuntu local tamién dispuso de les sos oportunidaes, pero el Real Oviedo amosóse sólidu na defensa y llogró caltener l’empat hasta’l pitíu final.
El repartu de puntos dexa un sabor agridulce pal Real Oviedo. Un puntu que sabe a poco y que apenas ayuda na clasificación pa un equipu que necesita entamar a sumar de tres cuanto enantes si quier llegar con opciones al tramu final de la temporada.
Agora toca pensar nel Valencia CF, próximu rival al que’l Real Oviedo va enfrentase nel Carlos Tartiere.
