Había que volver la sienda de la victoria, quitar el mal sabor de boca de la eliminación de Copa y nun perder el cercu de los puestos de privilexu de la tabla, y el Real Oviedo nun falló. Nun falló y sumó de tres nel Carlos Tartiere, onde la comunión ente equipu y afición foi clave pa llograr la victoria.
Optó Ziganda por un once formáu por Femenías; Carlos Isaac, David Costas, Dani Calvo, Pierre; Viti, Brugman, Jimmy, Borja Sánchez; Obeng y Borja Bastón, que fueron de menos a más, cuayando una gran segunda metá, calidable, aciertu y goles.
La primer metá tuvo un entamu alborotáu, con un Real Oviedo que dende los primeros minutos fízose col control del xuegu, aplicáu en defensa y con bona movilidá de balón nel centru del campu. Enfrente, un Alcorcón que dexó a los de la capital del Principáu proponer, buscando'l xuegu directu, pero ensin apenes llegar a la área de Femenías. Les más clares del primer tiempu fueron pa los azules, colos homes d'ataque bien activos de cara a puerta.
Tres el pasu por vestuarios, el partíu camudó. El Real Oviedo metió una marcha más, con un gran entamu, nel que Brugman aprovechó una bona contra pa poner, con un gran remate de cabeza'l 1-0. Tres el tantu oviedista llegó'l momentu de Borja Bastón, que con dos tantos punxo'l 3-0 nel lluminosu. El primeru d'ellos, nuna xugada pola esquierda, Brugman púnxo-y un centru al delanteru, que nun falló. Darréu, dos minutos más tarde, l'ariete oviedista remató dende'l corazón de la área pa superar Dani Gimenez. Movió'l banquín Ziganda, que dio entrada a Matheus Aiás y Luismi.Siguía'l conxuntu azul col control y les ocasiones del so llau. Pombo y Sangalli fueron los siguientes n'entrar al terrén de xuegu, y Montiel l'últimu cambéu de los de Ziganda. El Alcorcón llogró'l so premiu nel descuentu, poniendo'l 3-1 antes del pitíu final.
El Tartiere volvió ruxir colos valientes que desafiaron a la fria y lluviosa tarde nueche nel estadiu oviedista. La comunión ente equipu y afición, recuperando la feliz haka tradicional dempués d'antigües victories, punxo'l broche d'oru pa volver tocar puestos de Play Off munchos meses dempués.
