Namái valía ganar y ganóse. El Real Oviedo derrotó esti sábadu al Girona FC por 1-0 gracies al gol d'Ilyas Chaira na segunda metá y los azules volvieron sumar de tres nel Carlos Tartiere pa nun dexar de creer na permanencia. Cola pitada final, l'oviedismu volvió sorrir dempués de munchu tiempu y festexó tres puntos que lleventen l'ánimu de tola afición carbayona.
Aarón Escandell, Nacho Vidal, Costas, Carmo, Javi López, Colombatto, Sibo, Reina, Hassan, Ilyas Chaira y Fede Viñas. Asina salió'l Real Oviedo al Carlos Tartiere nun alcuentru onde entamó meyor el Girona FC. Los de Michel llevaron el control del partíu dende l'entamu y tuvieron la posesión mientres que a los de Guillermo Almada costábales facese col balón y llegar sobre la metá visitante.
A pesar del bon entamu del cuadru catalán, el Real Oviedo aguantó la primer metá y foi con empate a cero nel marcador. Tres la reanudación, los ovetenses salieron con una marcha más y foron en busca de los tres puntos. Thiago Fernández y Santi Cazorla sustituyeron a Hassan y Reina nel minutu 64 y el choque camudó.
Diez minutos más tarde, y tres d'entrar nel campu Fonseca y Lucas, una gran xugada combinativa de Cazorla, Javi López y Thiago Fernández finó col gol d'Ilyas Chaira. L'estremu culminó una cadena perfecta de pases pa rematar a plazer y poner el 1-0 pa tola lloucura del oviedismu nel Carlos Tartiere.
El Girona volcóse con tolo en busca del tantu del empate pero un Oviedo con garra, coraxe y aguerríu que supo aguantar de toes les maneres pa llevar una victoria vital. Con estos tres puntos, el cuadru carbayón suma un total de 16 puntos y nun dexen de creer na llucha pola permanencia.
