Nun hai nada meyor que la sonrisa d'un neñu, y si se llogra gracies a los nuestros colores, súmase l'arguyu de poder repartir felicidá.
El Real Uviéu unvió a Kenia al traviés de la ONG Perlas en el Barro más d'una ventena de camisetes pa los neños del orfanatu de Kissi. Los pequeños punxeron les elástiques de la temporada presente y pasada, de la firma Adidas, con una gran allegría, hasta llegar a querer caltener puestes les etiquetes, polo raro que-yos resulta estrenar daqué nuevo.
Amás, el nuestru xugador keniata McDonald Mariga unvió-yos un mensaxe nel so idioma natal pa que reciban el nuestru ciñu y collaborar a ser un motivu pequeñu de la so allegría.
