Volvía LaLiga al Carlos Tartiere, volvía'l Real Oviedo a encarar un alcuentru oficial nel NMR Carlos Tartiere, y fízolo recibiendo al Cartagena, que s'estrenaba na categoría, nun partíu qu'acabó ensin goles, con repartida de puntos para dambos equipos.
Con un once formáu por Femenías, Juanjo Nieto, Grippo, Arribas, Mossa; Viti, Edgar, Tejera, Borja Sánchez; Samuel Obeng y Javi Mier saltaron los azules para encarar la primer cita d'esta nueva temporada, amosando dende los primeros minutos les sos intenciones, metiéndo-y ritmu al partíu, con presiones altes y combinaciones ente los sos homes d'ataque. Túvola Arribas, en doble ocasión, nos compases iniciales del choque, pero'l porteru primeru y depués el travesañu esbarataron les opciones d'adelantrase nel marcador. Borja Sánchez tamién s'atopó col poste de la portería defendida por Marc Martínez, ente que Edgar, Grippo y Viti tamién dispunxeron d'ocasiones p'abrir el marcador. Con un Real Oviedo perbién llantáu en defensa, ensin apenes peligru sobro la meta de Femenías llegó'l descansu.
Nel segundu actu, con un guion bien similar a los primeres cuarenta y cinco minutos, Javi Mier dispunxo de la ocasión más clara del alcuentru, tres una internada pela banda de Juanjo Nieto, que l'uvieín remató raspiando'l poste de la portería visitante. Ziganda movió'l banquín dando entrada a Sangalli y Mujica, que sustituyeron a Viti y Javi Mier, pa darréu introducir a Lucas en sustitución de Mossa. L'alcuentru entró nuna fase alborotada, con munches interrupciones per parte de los cartaxinenses. Nel tramu final Cedric y Riki salieron a escena.
Repartida de puntos nel estrenu ligueru del Real Oviedo, que la próxima selmana va viaxar a tierres burgaleses pa midise al Mirandés.
