Remontada épica en Mestalla

El Real Oviedo firmó esti martes una remontada pal recuerdu en Mestalla. Los azules impuxéronse por 1-2 al Valencia nun partíu vibrante, con dos goles en namás un minutu d’Ilić y Rondón, que sellaron la primer victoria a domicilio de la temporada.

 

El choque nun pudo entamar peor pa los carbayones. Namás se llevaben xugaos los tres primeros minutos de partíu cuando Danjuma adelantó al equipu valencianista con un golazu de tijera. L’Oviedo intentó d’asitiase nel campu, pero’l gol tempraneru dio-y confianza a los locales, que incluso pudieron ampliar distancies na segunda metá dende’l puntu de penalti. Ehí apaeció la figura d’Aarón Escandell, qu' adivinó la intención del autor del únicu gol del choque y paró la pena máxima calteniendo con vida al equipu.

 

Na segunda parte, el cuadru ovetense salió con una marcha más y tuvo l’empate con delles ocasiones, magar el guión del partíu nun camudó radicalmente hasta los instantes finales. El técnicu oviedista movió’l banquín y dio entrada a Rondón ya Ilić, dos homes que sedríen protagonistas absolutos. Nel minutu 85, Ilić aprovechó un saque d’esquina pa poner l’empate. Namás sesenta segundos dempués, Rondón culminó la remontada pa la locura del oviedismu.

 

Con templanza y esfuerciu, el Real Oviedo supo defender la so renta nos últimos minutos pa asegurar tres puntos d’oru, los primeros fuera del Tartiere nesta temporada. Una victoria que reforza la moral del equipu y que demuestra la so capacidá de reacción y el carácter de la plantilla.