La fecha 28 del calendariu llevó al Real Oviedo a tierres catalanes, para vese les cares col RCD Espanyol, na primer visita de los azules al estadiu del conxuntu de Cornellá.
Femenías; Juanjo Nieto, Grippo, Bolaño, Lucas; Sangalli, Edgar, Tejera, Borja Sánchez; Javi Mier y Rodri Ríos fueron el xugadores escoyíos por Ziganda para midise énte unu de los conxuntu qu'ocupen los puestos altos de la tabla, nun alcuentru nel que los de la capital del Principáu fueron de menos a más. Na primer parte, na que l'Espanyol salió meyor que los azules, los locales aprovecharon una de les primeres acciones de les que dispunxeron para, tres un tiru de Raúl de Tomás, anotar el primeru al refugue de la parada de Joan Femenías. Tres el gol, sobre'l minutu 20 de xuegu, los azules armáronse, fueron faciéndose col control de balón y dieron un pasu adelantre, empezando a buscar la portería de Diego López. Didac Vila, con una entrada revisada pol VAR; vería la colorada y dexaría al conxuntu catalán con un home menos, circunstancia qu'aprovecharía'l Real Oviedo para averase más al arcu local. Los últimos minutos son de dominiu oviedista, con opciones que nun llogra materializar na portería del conxuntu perico.
Nel segundu actu, con una tónica similar a los primeres 45 minutos, los de Vicente Moreno volvieron entrar meyor al partíu, pero'l conxuntu oviedista foi recuperando'l balón y el control del xuegu, frutu de los cambeos que realizó Ziganda, dando entrada a Borja Valle, primero, y darréu a Blanco Leschuk y Nahuel Leiva. Esti postreru, nuna gran contra, pondría l'empate nel lluminosu, con un gran tiru dende la frontera de la área. Col empate, el choque entró nun tramu d'ida y vuelta, nel que dambos equipos buscaron aumentar la renta nel marcador, pero nun consiguieron materializar les ocasiones que dispunxeron. Samu Obeng foi l'últimu cambéu nel Real Oviedo.
Nuevu puntu para'l conxuntu carbayón, que suma ocho de los postreros doce puntos apostaos. Los azules van recibir la próxima xornada al Leganés nel NMR Carlos Tartiere, el domingu dende les 20:30 hores.
