Llegaba'l Real Oviedo precisáu a Montilivi, pero tamién el Girona. Un once con cambeos nel conxuntu oviedista, con Mossa, Jimmy y Saúl entrando d'entamu n'una primer metá na que, lo meyor que fixo'l conxuntu oviedista foi nun descomponese. Salió fuerte'l Girona y dominó nos primeres compases del alcuentru. Lunin intervieno con seguridá nos acercamientos locales y l'equipu creció col pasu de los minutos. El penalty decretáu pol colexáu en contra del Girona por una mano clara na área foi correxíu pel llínea decretando saque d'esquina. L'enfadu nun pudo col equipu de Rozada que se defendió hasta'l descansu.
Entró Tejera al entamu de la segunda y el Real Oviedo dispunxo de los sos meyores minutos y de la ocasión más clara nun pase de Mossa al puntu de penalty que remató Sangalli forzáu y unvió fora. Pero respondió'l Girona, n'una falta decretada, que nun yera. Nel remate del so llanzamientu, Stuani anotó un bon gol que ponía l'unu a cero nel marcador. Pocu dempués llegaba l'empate. Facíalo tres una bona xugada per banda esquierda, pase de Saúl a la frontera y remate de primeres de Tejera qu'anotaba con un disparu cruciáu l'unu a unu. Rozada metió a Ibra y quitó a Saúl y el Real Oviedo dispunxo de dalgún acercamientu más para llevase l'alcuentru, pero'l puntu da-y daqué d'osíxenu al equipu antes de recibir al Albacete nel Tartiere.
