Superaos en Valleques

El Real Oviedo nun pudo sumar na so visita a Vallecas y cayó derrotáu por 3-0 nel Estadiu de Vallecas, nel alcuentru aplazáu que suponía una auténtica final pa los azules na so llucha pola permanencia. El conxuntu carbayón viose superáu dende l'entamu por un rival que dominó'l xuegu y castigó con eficacia a los carbayones pa dexar mui tocáu al equipu de Guillermo Almada.

Dende'l pitíu inicial, el Rayo impunxo'l so ritmu. Con una posesión prácticamente total mientres la primer metá, los madrilanos monopolizaron el balón y sometieron al Oviedo. Los locales xeneraron les ocasiones más clares, ente que'l conxuntu azul apenas pudo estirase en aiciones aisllaes que nun llegaron a inquiedar la portería defendida por Augusto Batalla.

L'Oviedo resistía como podía, con trabayu defensivu y solidaridá, pero ensin capacidá pa enllazar posesiones llargues nin pisar área contraria con peligru. Cuando paecía que'l descansu llegaría col empate inicial, el Rayo alcontró premiu. Un disparu dende la frontal foi desviau por Aarón Escandell, pero'l rechazu cayó nos pies de Jorge de Frutos, que nun perdonó y adelantó a los locales al filu del intermediu.

Dempués del pasu por vestiarios, Almada buscó camudar el rumbu del partíu con un doble cambiu. Santi Cazorla y Thiago Fernández entraron al terrén de xuegu en sustitución de Sibo y Ilyas Chaira, col propósitu de ganar presencia en campu rival y dotar al equipu de mayor claridá con balón.

Sicasí, el golpe definitivu llegó demasiao pronto. Lucas cometió penalti y, nuevamente, Jorge de Frutos asumió la responsabilidá dende los once metros pa firmar el segundu tanto de la tarde. El tanto dexó mui tocáu a un Oviedo que nun llograba refacese y que, superada la hora de xuegu, encaixó'l terceru. Álvaro aprovechó una aición dientro del área y, dempués d'un primer intentu repelíu por Escandell, batió al guardameta azul nel segundu remate pa zarrar el marcador.

L'Oviedo echó'l restu en busca d'un tanto que-y metiera nel partíu pero nun hubo forma. Esta derrota dexa a los ovetenses nuna situación comprometida nel so oxetivu d'abandonar los puestos de descensu y fai que la permanencia siga a nueve puntos.

Próximu partíu: nuevamente a domiciliu frente al RCD Espanyol.