Viaxó'l Real Oviedo a Madrid, y fízolo pa visitar Butarque, feudu d'un Leganés llamáu a ocupar los puestos altos de la clasificación, pero con urxencies para sumar de tres.
Na tarde del domingu, Ziganda optó por un once formáu por Femenías; Lucas, David Costas, Dani Calvo, Pierre; Viti, Brugman, Jimmy, Borja Sánchez; Matheus Aiás y Borja Bastón, que volvía a la que foi la so casa na pasada campaña.
La primer parte empezó con un Leganés que fixo valir la so condición de llocal pa llevar el pesu de xuegu, faciendo que'l conxuntu de la capital del Principáu tuviera que llevar a cabu una presión alta pa tratar de quitar la pelota a los pepineros. Femenías y la defensa carbayona xugaríen un papel fundamental ente les acometíes del Leganés, que tuvo la ocasión más clara nes botes de Arnáiz, con parada de Joan y posterior impactu nel llargueru. Intentólo Matheus n'ataque, atopándose colos defenses locales. De nuevu Femenías y la defensa azul seríen claves pa evitar el tanto madrilanu. Ensin cambeos nel lluminosu llegóse al descansu.
El pasu por vestuarios fixo que'l Real Oviedo entrara al partíu con más ritmu y pesu nel xuegu que nel primer actu. Ziganda movió'l banquín dando entrada a Pombo y Sangalli. Sería'l maño el que propondría los meyores minutos de xuegu oviedistas, esfrutando d'ocasiones clares, como la de Borja Sánchez que foi repelida polos centrales. Luismi y Obeng fueron los siguientes n'entrar al terrén de xuegu, qu'ayudaron al equipu a compensar los bonos momentos del Leganés, que nun consiguió superar a Femenías. Carlos Isaac foi l'últimu cambéu d'un partíu qu'acabó con acciones a balón paráu para los azules, que pudieron desanivelar l'alcuentru nuna ocasión de Dani Calvo.
Puntu en Butarque para'l conxuntu de la capital del Principáu, que la próxima xornada va tratar de facelo bonu recibiendo en casa al Amorebieta.
