Asitiada en plenu corazón d’Uviéu, nel númberu 22 de la cai Caveda, la tienda oficial nueva del Real Uviéu presentóse ayeri a medios de comunicación y patrocinadores, amás de cuntar con un gran númberu de representantes de la entidá azul.
L’establecimientu nuevu tien una estética vintage, con un gran númberu d’elementos uviedistes qu’axunten el pasáu y el presente de la entidá, amás de los componentes característicos d’Adidas, que participó activamente nel desenvolvimientu d’esta iniciativa nueva, que non solo va ser un espaciu de compra, sinón que tamién quier ser un sitiu onde los uviedistes se sientan arguyosos del club y pueda presta-yos.
L’actu d’inauguración cuntó cola presencia d’una representación amplia del Real Uviéu, encabezada por Joaquín del Olmo; el conseyeru, Fernando Corral; el responsable de rellaciones institucionales, César Martín; el xerente, David Alonso Mata; el director deportivu, Ángel Martín, amás de los xugadores de la primer plantiya Toché, Christian Fernández, Diegui Johannesson, Mossa, Ibra y Osvaldo Alanís. Amás, al actu asistieron la presidenta del Real Uviéu Femenín, miembros de l’Asociación de Peñes, patrocinadores y los medios de comunicación.
El conseyeru de la entidá, Fernando Corral, atendió a los medios de comunicación axuntaos pa la ocasión, valorando l’apueste nuevu del club, que definió como “una iniciativa que combina lo comercial y l’alcordanza de la historia del club. Dende’l Real Uviéu buscamos aunir un espaciu de compra con un sitiu pa que los aficionaos puedan disfrutar del fútbol”.
Tocante a la parte comercial de la entidá, l’uviedín considera que “el proyectu ta funcionando perbién, marcha y medra a ritmu lentu. Tenemos un productu estrella, que ye la camiseta, pero cada añu intentamos anovanos. Vamos dir incorporando dellos productos, como les gafes oficiales o’l vestuariu pa perros, que nes feches vinientes van tar disponibles. Pasemos de les 200 referencies, esto diz muncho. El club va medrando”.
Finalmente, el conseyeru de la entidá quixo “agradecer a Integra, Adidas, BSB, Armando Cuendias, amás d’a tolos que fixeron posible esta iniciativa”, destacando “l’esfuerciu importante pa que l’uviedista sienta nesti espaciu nuevu la so casa”. Dende esta mañana a les 10:00 hores, los aficionaos azules puen conocer la tienda nueva oficial y adquirir los sos productos oficiales de la temporada dende esti momentu. L’horariu de la mesma va ser de llunes a sábadu, de 10:00 a 21:00 hores, de forma ininterrumpida.
AST
