El Real Oviedo llegó a Montilivi coles opciones matemátiques d'engarra-y el puestu a un Girona en llugares de play off. Apostó Ziganda pol 4-3-3 con Brugman de regresu, y los primeros minutos l'equipu sufrió. El conxuntu catalán impunxo un altu ritmu dende l'empiezu, y materializó esa superioridá nun balón al refugue, tres xugada d'estratexa, que se convertía nel unu a cero a los diez minutos del arranque. Camudó entós Ziganda y
apostó por retrasar a Luismi nel centru de la zaga. Con cinco tras l'equipu empezó a atopase más cómodu, combinaba y llegaba a portería rival anque ensin opciones clares d'anotar. Luismi remató alto, túvola Viti tamién, y Jimmy tuvo la más clara nuna internada na área pequena que'l porteru unvió a córner. Ventaya pola mínima para los locales al descansu.
Al entamu de la segunda'l conxuntu oviedista nun pasó apuros en defensa, pero tampoco llograba llegar con claridá n'ataque. Entraron Borja Sánchez y Joni Montiel. Aumentó la velocidá del xuegu, y los acercamientos con peligru a la portería de Juan Carlos. Precisamente col equipu entornáu buscando l'empate, llegaba'l dos a cero anotáu por Stuani. Entá asina retrucó darréu'l Real Oviedo col dos a unu, anotaba Borja Sánchez cruciando'l balón tres un bon pase al llombu de la defensa de Joni Montiel. Siguió intentándolo, hasta'l final, l'equipu oviedista, pero dir ensin el premiu final.
Una derrota dura, segunda consecutiva, para l'equipu que mañana va entrenar a la so llegada a Uviéu, alrodiu de les 14:00 hores.
