El Real Uviéu empieza nel día de güei’l plazu de soscripción llibre d’una ampliación de capital social aprobada na Xunta Xeneral Ordinaria y Estraordinaria d’Accionistes del 14 d’avientu en 2.531.872,25, que s’executó con prima d’emisión, calculando ésta a tenor del valor razonable de les acciones, teniendo en cuenta los oxetivos de resultaos económicos futuros. L’oxetivu de la mesma ye consolidar la situación financiera actual.
Por esti motivu, l’ampliación de capital, na qu’ayeri acabó’l plazu de dos meses pa la soscripción preferente d’accionistes actuales, empieza güei’l segundu tramu, d’adquisición llibre. Recuérdase que les acciones tienen el valor nominal de 10,75, siendo’l so valor d’emisión de 30 € (la so prima d’emisión ye de 19,25 por cada acción).
Estos títulos son de la mesma clas, serie y colos mesmos derechos que les acciones enantes en circulación. Como los accionistes actuales nun soscribieron toles acciones puestes en circulación, agora’l Conseyu d’Alministración pue almitir ufiertes de soscripción de les acciones sobrantes por terceres persones, con un plazu máximu de seis meses dende’l día de güei.
Recordamos l’anuncia oficial que se publicó va dos meses nel BORME:
"En cumplimientu del artículu 304 y 305 de la Llei de Sociedaes de Capital comunícase que’l Conseyu d’Alministración na so xunta celebrada’l 14 d’avientu del 2016 alcordó, nel exerciciu de les facultaes delegaes pola Xunta Xeneral Ordinaria y Estraordinaria d’accionistes del REAL UVIÉU, S.A.D. celebrada’l día 14 d’avientu del 2016, l’ampliación del capital social nos términos que se detallen de siguío:
Ampliar el capital social na cantidá de 2.531.872,25 € cola creación y puesta en circulación de 235.523 acciones nominatives nueves, de 10,75 € de valor nominal caúna, siendo’l valor d’emisión de 30,00 € por acción (prima d’emisión 19,25 € por acción), de la mesma clas, serie y colos mesmos derechos de les que tán en circulación actualmente, numberaes del 1.524.884 a 1.760.406, dambos inclusive, reconociendo’l derechu de soscripción preferente de los accionistes actuales en proporción al valor nominal de les que tengan, a razón d’una acción nueva por cada 6,4744547 de les anteriores.
El plazu pa exercer el derechu de soscripción preferente ponse en dos meses cuntaos de magar se publique l’anuncia de la ufierta de soscripción d’acciones nueves en Boletín Oficial del Rexistru Mercantil. Pa exercer el derechu de soscripción preferente va haber qu’ingresar, na cuenta que la Sociedá tien en “La Caixa” (ES94-2100-5700-0502-0008-2078), l’importe total d’emisión de les acciones que quieren soscribise, indicando los datos del accionista que lo fai, amás del númberu d’acciones que quier soscribir.
Pal casu de que non tolos accionistes exercieren el derechu de soscripción preferente nel plazu indicáu, el Conseyu d’Alministración va poder almitir ufiertes de soscripción de les acciones sobrantes por terceres persones, sían o non accionistes. Nesti casu, el Conseyu d’Alministración va disponer d’un plazu máximu de seis meses cuntaos de magar acabe’l plazu de soscripción preferente p’axudicar llibremente les acciones sobrantes.
Si l’aumentu de capital nun se soscribiere dafechu nel plazu anterior, almítese espresamente l’aumentu incompletu, quedando’l capital aumentao na cantidá de les soscripciones efectuaes y anulaes les acciones non soscrites.
Desque executáu l’alcuerdu d’aumentu de capital social, los alministradores han da-yos una redacción nueva a los estatutos sociales con cuenta de que recueyan nellos la cifra nueva de capital social".
