La primera de Primeres

Regalar una victoria a la so xente. Con esa mentalidá llegaba’l Real Oviedo a la tercer xornada de LaLiga EA Sports. Los carbayones tornaben al Carlos Tartiere una selmana dempués de la derrota énte’l Real Madrid y facíenlo cola intención de sumar los tres primeros puntos nesti entamu de competición. Aarón Escandell, Nacho Vidal, David Costas, Dani Calvo, Rahim, Ilyas, Dendoncker, Reina, Ejaria, Ilic y Fede Viñas. Asina foi’l once escoyíu por Veljko Paunovic énte la Real Sociedá.

 

Pablo Marín, con un zapatazu direutu a la portería d’Aarón, tuvo la primera del conxuntu donostiarra. Pero, Escandell, con una gran estirada, desvió la pelota a córner. Ejaria tuvo la réplica pa l’Oviedo: l’estremu inglés disparó cruzao y el so tiru pasó rozando’l palu derechu d’Álex Remiro. Diez minutos dempués, y tres d’una aición ensayada de los azules, Ilic probó al porteru de la Real con un disparu dende la frontal que se foi per enriba del travesañu.

 

La mala noticia de la primer parte foi’l cambéu obligáu d’Ilyas, que foi sustituyíu por Hassan. Unu dempués, Ahien intentólo con un remate de primeres dende la frontal que terminó marchándose per enriba del travesañu. Pasada la primer media hora de xuegu, Aarón volvió intervenir, de manera providencial, pa evitar el gol de los de Sergio Francisco. Esta vegada, énte Oyarzabal. Poco dempués, estallaría l’alegría nes gradires del Carlos Tartiere. Hassan facíase col balón en campu propiu, dexaba atrás a Gorrotxategi y daba’l pasu pa que Dendoncker, que llegaba dende segunda llinia, batiere a Remiro. 1-0. Primer gol del conxuntu carbayón en Primeres.

 

Dende l’entamu de la segunda parte, la Real salió a buscar l’empate y pudo facelo hasta en dos ocasiones. Primero foi Oskarsson, que remató escoráu, y dempués Oyarzabal, a la salida d’un córner. Pero dambos tiros fueron atayaos pol guardameta del Oviedo. Dos minutos dempués, el palu evitó’l segundu tantu azul. Hassan, con un zurdazu al palu llargu, tuvo a puntu de marcar, pero’l so tiru dio na madera. Cazorla, Rondón, Sibo y Brekalo entraron y’l delanteru venezolanu aprovechó’l fallu d’Aramburu pa sorprender a Remiro, que taba daqué adelantáu, con un disparu llonxanu que se foi desviao. Nel 78, Turrientes buscó l’empate con un tiru de volea dende fuera del área que se marchó per enriba’l travesañu. Nel tramu final hubo tiempu pa dos ocasiones más pa los de Veljko Paunovic, nes botes de Brekalo y Rondón, y una nueva parada d’Aarón a Turrientes. 8.840 díes y 24 años dempués, el Real Oviedo y el Carlos Tartiere volvieron a celebrar un gol y una victoria en Primeres.