El técnicu del Real Oviedo valoraba na sala de prensa les situaciones que-y costaron al equipu la derrota. "Con bastante tristeza porque tabemos faciendo un bon partíu, compitiendo d'igual a igual, y los errores condenáronnos en llugares onde nun podíemos fallar, porque los xugadores a los que nos enfrentábemos nun nos iban perdonar. Lamentablemente acabó costándonos el partíu".
Preguntáu por si-y dio más rabia perder asina, col plan de partíu executáu hasta esi momentu a la perfeición, Guillermo Almada reconocía que "nosotros collaboramos nes oportunidaes que ellos tuvieron y nun nos perdonaron. Habíemoslo faláu, trabayáu nel campu". Sobre la solidez defensiva, el técnicu uruguayanu aseguraba que "solidez tuvimos, pero los errores individuales tuvimoslos. Ehí nun esiste trabayu colectivu que puedas facer pa tratar de neutralizalu. Nun recuerdo situaciones na primer parte y na segunda tuvieron dalguna más porque tomamos más riesgu".
Con respeutu a la distancia sobre la zona de salvación y cómo afronta'l equipu esa situación, el técnicu insistía en que "hai que lluchar hasta'l final. Fiximos análisis sobre los últimos cuatro partíos colos xugadores y merecíemos otru resultáu. El partíu que vien que xugamos de llocales tenemos que tratar d'algamar una victoria que mos empurre, xugando bien, regular o deficiente. Ye un partíu sumamente importante pa nós", sentenciaba.
Finalmente, y preguntáu por un mensaxe pa la afición, "desvivímonos por salir d'esta situación xunto colos futbolistes. El camín ye xugar como la primer parte y sortear los imponderables que tenemos que sortear. Faltónos definición y evitar esos errores. Tratar de ganar pola vía que seya pa dar a la nuestra xente lo que se merece, que ye ganar".