L'entrenador del Real Oviedo, Guillermo Almada, compareció esta mañana en rueda de prensa nel Estadiu Carlos Tartiere enantes de viaxar a San Sebastián, onde l'equipu va enfrentase mañana a la Real Sociedad.
Almada destacó'l trabayu de los sos xugadores mientres la selmana: “Entrenaron mui bien. La so entrega y predisposición ye daqué que-yos define. Debemos sostener más tiempu lo bonu que fiximos l'otru día. Queda muncho campeonatu y tenemos que tratar de sumar de tres, por más que sabemos de la complexidá pol bon momentu de la Real Sociedad”.
Preguntáu pola ausencia de Santiago Colombatto por acumulación de tarxetes y a les alternatives pa suplila. “Cazorla queremos que tenga un rol más ofensivu. Tanto Fonseca como Dendoncker pueden dános esi reemplazu. Cualquiera de los dos puede suplir la baxa importante de ‘Colo’”, esplicó.
Dempués de la última derrota, Almada reconoció'l golpe anímicu que supón caer, pero apeló a la reacción del grupu. “Siempres que tienes una derrota golpea. Pero hai que llevantase como seya. Son situaciones que hai que revertir con rebeldía, predisposición y fútbol. Nun ye un camín fácil y debemos sostener más tiempu lo que tamos faciendo bien y correxir los errores que mos lestren”.
Sobre'l rival, el técnicu foi claro: “Ye complicáu pola situación y por xugar contra la Real, que tien una gran plantía. Son rivales que debemos disfrutar, que mos van esixir al máximu. Tenemos que dir cola máxima ilusión de facer un bon alcuentru y creer a muerte na fortaleza grupal”. Pa amestar, “les distracciones golpiáronnos mui fuerte y l'efectividá del rival tamién. Si hai distracciones contra la Real, van facenos pagalo carísimu. Hai coses que facemos bien, lo más difícil, como ponenos por delantre nel marcador y xenerar situaciones, pero hai que sostenerlo nel tiempu. L'única manera ye con trabayu”.
Preguntáu pola resolución pendiente del non partíu disputáu ante'l Rayo, el técnicu uruguayu declaraba lo siguiente: “Tamos aliniaos coles autoridaes del club y que se mos dea la razón ye daqué lóxicu, pero eso nun depende de nós. Veremos la resolución final. Yo céntrime na Real Sociedad, más allá de los comentarios que facemos ente nós. El club ta detrás d'esa xusticia que se tien d'implantar”, concluyó.