El Real Uviéu quería confirmar la so meyoría de les últimes xornaes, a pesar de les baxes, énte un Almería que llegaba mancáu al Tartiere.
Anquela retocó l’once pola ausencia de Christian Fernández por sanción, y Carlos Martínez ocupó’l sitiu d’él. El partíu púnxose llueu de cara, nuna xugada bien guapa de Johannesson, que Mossa remataba de primeres, cola esquierda, p’anotar l’un a cero. Corría’l minutu dos de partíu, y el Real Uviéu dominaba dende’l principiu. Al cuartu d’hora de partíu, un centru dende la esquierda acababa nel remate de José Corpas, nel picu del área pequeña, que suponía l’empate pal Almería. Diba responder Javi Hernández con un remate n’área que s’estrellaba en poste, y el conxuntu andaluz noquiaba nel so siguiente averamientu col un a dos, obra de Juan Carlos, nun disparu cruciáu dende la frontal. Dende ehí, la posesión y el dominiu volvió ser uviedista, pero ensin aciertu. La más clara foi de Johannesson, con un remate axustáu al palu qu’aparó René, y llegóse al descansu.
Na segunda Anquela nun tardó en da-y entrada a Toché pa buscar la remontada. Bárcenas túvola clara nuna contra, conducida por Johannesson, pero unvió’l remate altu. Johannesson tiró alto, nel disparu de primeres a centru de Mossa, y el Real Uviéu quedaba con ún menos por doble mariella a Javi Hernández. A pesar de la inferioridá, el conxuntu uviedista siguió volcáu n’ataque, pero nin cola entrada de Steven foi quién materializar les oportunidaes. Omar Ramos debutó nos compases finales del alcuentru, pero nun foi abondo y el Real Uviéu encaxó una derrota que frena la so racha positiva de les últimes xornaes.
El próximu entrenamientu del equipu va ser mañana domingu, dende les 10:30 hores, n’El Requexón.
