El Real Uviéu llegó a un alcuerdu pa facese colos servicios del defensa Juan Daniel Forlín pa les dos temporaes vinientes.
El xugador, de 29 años d’edá, nació’l 10 de xineru de 1988 en Santa Fé, Arxentina. Debutó con 19 años nel Boca Juniors, que se formó dende pequeñu nes sos categoríes inferiores. Depués de la cesión al Real Madrid B una temporada, Forlín volvió a Arxentina pa ganar un sitiu na primer plantiya del Boca Juniors, col que se proclamó campión en dos competiciones, la Recopa Suramericana y el Campionatu Apertura. Depués de completar 33 partíos na campaña del 2009, trespasáronlu al RCD Espanyol, a les órdenes de Pochettino. Nel añu 2013, otru trespasu por valor de dos millones d’euros llevólu a les files del conxuntu qatarín Al-Rayyan, pero volvió cedíu pa una temporada al Boca Juniors, pa volver depués al conxuntu de Qatar hasta’l 2015, cuando marchó al Querétaro mexicanu, onde se proclamó campión de la Copa de México, y d’onde agora llega procedente.
Amás, Forlín foi convocáu cola Selección Arxentina por Diego Armando Maradona nel añu 2009, y completó un total de 249 partíos como profesional.
Forlín incorpórase al Real Uviéu pa militar pela primer vez na Segunda División Española, tres de facelo na Copa del Rei, la Copa de la Lliga, Copa Arxentina, Copa México, Acopa Libertadores, Copa Sudamerica, Concacaf Lliga Campiones, Primer División arxentina, méxicana y española. Destaca pol so xuegu equilibráu y completu, remanando bien tolos conceptos, tanto’l xuegu aereu como salida de balón y rapidez, amás de la so amplia trayectoria y palmarés.
El futbolista va incorporase nel intre a los entrenamientos, depués de sometese a reconocimientu médicu na Clínica Asturias, y va trabayar a les órdenes de Juan Antonio Anquela na sesión d’esta tarde.
Trayectoria:
(2006/7) Boca Juniors
(2007/08) Real Madrid B
(2008/9) Boca Juniors
(2009/13) RCD Espanyol
(2013) Al-Rayyan
(2014) Boca Juniors
(2015-17) Querétaro
La presentación oficial de Forlín como xugador nuevu del Real Uviéu va facese mañana a les 13 h nel Carlos Tartiere.
El xugador nun va facer declaraciones hasta’l momentu de la so presentación oficial.
