El porteru del Real Oviedo Aarón Escandell, compareció ante los medios na previa del choque d'esti domingu ante'l FC Barcelona, un partíu que'l guardameta oviedista afronta como una oportunidá pa reivindicase y competir al máximu nivel.
El porteru azul reconoció'l intensu trabayu del equipu mientres la selmana: “La selmana ye llarga, llevamos dende'l llunes preparando'l partíu, enfocaos en lo que mos va esixir un grandísimu rival que prácticamente fai tolo bien. Tenemos que tener los cinco sentíos activaos”.
Escandell nun escondió que la situación actual nun ye cómoda, pero insistió na importancia de caltener la ilusión: “Nun ye del agráu de naide, nengún tamos orgullosos y ye responsabilidá nuestra. Pero si estos partíos nun los afrontes con ilusión… cuando yes pequeñu suañes con xugar contra estos equipos. Tenemos que dir con ilusión”.
El guardameta azul foi claro al recordar la derrota en Pamplona, una de les más doloroses del cursu: “Ye la derrota que más dolió de la temporada. Salí mui frustráu. Costábanos marcar goles y agora facémoslo, punímonos por delantre dos veces y dieronnos la vuelta. Fuímos mui tocaos”. Sicasí, el mensaxe ye de compromisu absolutu: “Mientres haya esperanza vamos dir con tolo. Vamos dexanos tolo por esti escudu y lo del domingu ye otra final”.
Sobre los últimos díes del mercáu d'iviernu, Escandell quixo tresmitir tranquilidá y unión dientro del grupu: “El día a día ente nós ye mui bonu y entrenamos con muncha intensidá. Del mercáu nun tengo nin idea, son otros los responsables, pero seguro que los que tamos vamos dar tolo”. Nel planu personal, el porteru amosóse totalmente centráu nel club: “Nun recibí ufiertes nin plántiomelo. Toi tranquilín y enfotao nel Real Oviedo”.
Escandell reconoció que'l momentu deportivu tamién se nota fuera del campu: “Claro que pica lo que se diz del Real Oviedo, tamién na cai, pero nun pues entrar. Vamos lluchar hasta que los númberos digan lo contrario, empezando por Barcelona”.
El trabayu mental ye clave: “Ye difícil de xestionar y tamos trabayándolu cola psicóloga. La cabeza ye mui importante. Tamos notando meyora y tánnos dando ferramientes pa xestionalo tamién fuera del campu”.
Sobre'l rival, el guardameta destacó la dificultá del desafíu y el talentu individual del conxuntu azulgrana: “Vamos tener muncha faena. Ye un equipu que te pon les coses bien difíciles. Gústame muncho Lamine Yamal, anque por tolo que aporta destacaría tamién a Raphinha”.
A pesar de tolo, Escandell cree nes opciones del equipu: “Ye mui difícil, pero nun imposible. A base de trabayu, dar el 100% y creer en lo que mos pide'l míster. Tenemos que dexalo tolo nel campu y, pase lo que pase, dirnos con honor”.