Tal día como güei, un 10 de marzu, nel añu 1918, yera reinauguráu l'estadiu de Llamaquique tres haber sido sometíu a diverses obres de meyora por parte del Real Stadium Club Ovetense.
El Real Stadium, ún de los clubes fundadores del Real Oviedo, nos sos primeros tiempos xugara los sos partíos nel prau del Hospiciu, enantes de pasar a disputar los sos alcuentros nel campu de fútbol de Llamaquique.
Les meyores llevaes a cabu nel campu de Llamaquique y inauguraes en marzu de 1918 supunxeron la instalación d'una valla de separación ente'l terrén de xuegu y l'espaciu destinao a los espectadores. Amás, tres la valla, colocóse un bancu corríu alredor del terrén de xuegu, col que se crearon numberoses llugares d'asientu. Asina mesmu, el Real Stadium realizó obres de meyora nel terrén de xuegu pa desaniciar delles ondulaciones y otres irregularidaes que presentaba.
Con motivu de la inauguración de les meyores disputóse un partíu amistosu ente'l Real Stadium Club Ovetense y la Unión Deportiva Racing de Xixón, que finó cola victoria del equipu convidáu.
En 1923, el Stadium abandonaría'l campu de fútbol de Llamaquique pa instalarse nun nuevu feudu, l'estadiu de Vetusta.
Nel añu 1926, el Real Stadium Club Ovetense y el Real Club Deportivu d'Uviéu fusionaríense pa crear el Real Oviedo.