Con aficionaos del Sporting finalmente nes graes del Tartiere, el derby xugóse nel estadiu uvieín con un espectacular ambiente, al altor de l'afición oviedista. Na previa y nel entamu del alcuentru'l protagonismu absolutu foi para los aficionaos del Real Oviedo, ondeando les sos banderes para enmarcar un preciosu tifo dignu de les grandes ocasiones.
Nos primeros minutos pocu o nada xugóse al fútbol. Dambos equipos buscaben compensar al rival, y les úniques llegaes fueron de los de Javi Rozada, qu'apostó por Riki nel once titular. Ortuño tuvo la más clara, nun control y xiru na área, rematando al primer palu nun disparu qu'estenó la defensa a córner. Champagne intervieno para tocar lo cabal un disparu cruzáu, dende la derecha, y a la contra, que terminó tamién en saque d'esquina. Lo demás fueron faltes, intensidá, y pocu más peligru per parte de cualesquier de los dos equipos.
Na segunda metá empezó a llover, y l'estáu del verde empioró. El Sporting aumentó la intensidá, y al Real Oviedo costába-y atacar. Salieron Omar ya Ibra dende'l banquín, y a pesar de que lo intentó'l conxuntu oviedista y tuvo dalguna opción a balón paráu, tamién l'equipu xixonés que vió anuláu un gol en fora de xuegu. Pocu más, para un empate ensin goles nel Tartiere, tres dos victories nos dos últimos derbis nel estadiu uvieín, qu'a l'afición azul súpo-y a pocu.
