El Real Oviedo viaxaba nesta ocasión a Alcorcón para midise al combináu madrilanu na xornada númberu 32 de LaLiga Hypermotion. El conxuntu azul llegaba a esti choque en sumando un puntu énte'l Racing de Santander nel Carlos Tartiere y col oxetivu claru de llograr un trunfu col que dar un golpe enriba de la mesa clasificatoriamente falando. Con dellos centenares de oviedistas nes graes de Santo Domingo, el cuadru carbayón salió al campu con un once formáu por: Leo Román, Viti, Dani Calvo, Luismi, Abel, Colombatto, Jimmy, Cazorla, Sebas Moyano, Paulino de la Fuente y Alemão.
Salieron los de Luis Carrión cola idea d'apoderar el xuegu y ser protagonistes ante un AD Alcorcón que taba bien precisáu por sumar los trés puntos y averase escontra la permanencia. Santi Cazorla movía al equipu y trataba de llevar la voz cantante na medular ente que los locales buscaben sosprender a los uvieinos a la contra. Paulino de la Fuennte, nel 9', dio'l primer avisu con un remate a la media vuelta que nun llogró superar a Jesús Ruiz.
Alemão tamién tuvo la oportunidá p'abrir el marcador tres un bon centru de Sebas dende la esquierda pero'l so testerazu, que-y impactó nel so home, colóse llixeramente esviáu. Un pase maxistral de Cazorla al espaciu dexó prácticamente mano a mano a Sebas Moyano anque'l "17", que controló bien l'esféricu, nun pudo definir énte la salida de la meta del Alcorcón. Los de Nafti tamién tuvieron les sos llegaes sobro la meta de Leo Román pero ensin escesivu peligru. El choque llegaba al descansu y taba tou por decidir.
Tres el pasu por vestuarios, los de Carrión fueron claros dominadores del xuegu. Nel 51', Cazorla anotó'l so primer gol cola camiseta azul anque'l VAR anular por fora de xuegu previu de Alemão. Los de la capital del Principáu nun cesaron nos sos ataques y el gol llegaría nuevamente. Masca, qu'entrara na segunda parte, superó a Jesús Ruiz con un gran remate cola pierna derecha anque otra vegada en posición antirreglamentaria. El 0-0 siguía imperando nel marcador y Seoane y Borja Sánchez entraben al campu en llugar de Cazorla y Sebas Moyano.
Cuando averábamos a la recta final del partíu, el Alcorcón nun perdonó la so única ocasión de la segunda parte y llevóse los trés puntos. Mosquera, dende fora de la área, sacóse un disparu que, en estrellándose nel cuerpu de Luismi, coló na portería defendida por Leo Román. 1-0 y xarru enagua fría pa tolos siguidores azules presentes nes graes de Santo Domingo. Yá nel descuentu, Masca tuvo l'empate pero una bona mano embaxo del meta local evitar.
Dura derrota en tierres madrilanes pal Real Oviedo que remata la xornada númberu 32 con 48 puntos y yá piensa nel so próximu compromisu ligueru. El combináu carbayón va recibir el próximu sábadu, a partir de les 18:30 hores, nel Carlos Tartiere al Villarreal B cola idea de tornar a la sienda de la victoria énte la so xente.
