El Real Oviedo viaxaba esta nueche a tierres murcianes para encarar el partíu correspondiente a la xornada 28 de la LaLiga Smartbank énte'l FC Cartaxena. Los d'Álvaro Cervera formaben d'entamu con: Braat, Lucas, Rodri Tarín, Dani Calvo, Abel Bretones, Moro, Luismi, Mangel, Viti, Koba y Manu Vallejo.
Arrincó l'alcuentru de la peor manera posible pa los azules. Cuando apenes se llegara al minutu 7 de partíu, el Cartaxena adelantróse nel marcador gracies al tantu d'Iván Martos. El llateral del equipu blanquinegru batía a Braat con un gran disparu dende la frontera énte'l que'l porteru del Real Oviedo nada podía facer. Col 1-0 nel marcador, el combináu d'Álvaro Cervera tendría l'empate nes botes de Raúl Moro. El nuevu atacante quedóse mano a mano énte la meta visitante, dempués d'una gran pase de Vallejo, pero'l so remate colóse alto no que sería l'acción más clara del Real Oviedo nos primeres 45 minutos.
Magar esa gran oportunidá, sería'l conxuntu de Luis Carrión, en cantu del descansu, el que volvería anotar. Musto, nel minutu 38, aprovechaba una falta botada dende'l perfil esquierdu pa bater a Braat de cabeza y punxo ´l segundu nel marcador. Nel descuentu de la primer parte, Moro gociaría nuevamente d'una gran ocasión pero'l so disparu yera repelido nuevamente por Aarón.
Tres la continuación, Manu Vallejo taría a puntu de retayar distancies. El gaditano, tres una gran contra de los azules, probaba fortuna dende la frontera de la área pero'l so disparu colábase raspiando'l poste de la portería del conxuntu local. Cervera, col pasu de los minutos, movió'l banquín y dio entrada a Leo Sequeira y a Montoro, nel minutu 57, y a Borja Sánchez y Camarasa nel 72´. El quintu cambéu del combináu uvieín sería'l futbolista del Vetusta, Enol Rodríguez, qu'ingresaría al terrén de xuegu namás empezar la segunda parte.
El carbayones nun baxaron los brazos y nel minutu 80 llograron el premiu del gol. Leo Sequeira aprovechó un gran centru d'Abel Bretones dende la esquierda pa retayar distancies con un bon gol de cabeza. Los uvieinos entornáronse col tantu del arxentín y buscaron hasta'l final el tantu de la igualada. Ángel Montoro, nel 90´, tendría l'empate na so bota derecha pero finalmente'l so disparu, dende la frontera de la área, colábase raspiando'l poste derechu de la meta defendida por Aarón. El colexáu añediría cuatro minutos más al partíu pero nun foi abondu y el Real Oviedo terminaría cayendo derrotáu nel Estadiu Municipal Cartagonova.
